کراچی ( )آرٹس کونسل آف پاکستان کراچی کی جانب سے معروف موسیقار ”نثار بزمی“ کی 100ویں سالگرہ کے موقع پر تقریب کا انعقاد حسینہ معین ہال کیا گیا جس میں صدر آرٹس کونسل محمد احمد شاہ ،معروف اداکار مصطفی قریشی ، معروف اداکارہ ممتاز بیگم، حسن جہانگیر اور استاد نفیس خان سمیت فلم اور شوبز انڈسٹری سے وابستہ شخصیات نے خصوصی شرکت کی ، تقریب کا آغاز نثار بزمی کی سالگرہ کا کیک کاٹ کر کیا گیا جبکہ نثار بزمی کی داستانِ حیات پر تنویر احمد آفریدی کی کتاب ”کون یادوں کو زنجیر پہنائے گا“ کی تقریب رونمائی بھی کی گئی، اس موقع پر صدر آرٹس کونسل محمد احمد شاہ نے اظہار خیال کرتے ہوئے کہا کہ نثار بزمی کی سالگرہ منانا ہمارے لیے اعزاز کی بات ہے، نثار بزمی پاکستان فلم انڈسٹری کے ممتاز موسیقارتھے، وہ آرٹس کونسل کے پرانے ممبر اور ساؤتھ ایشیاءکے بہت بڑے میوزک ڈائریکٹر تھے، دس گیارہ سال کی عمر سے انہوں نے موسیقی کی دنیا میں قدم رکھا۔ نثار بزمی نے ہندوستان میں بڑا نام کمایا، وہ اپنے عروج پر پاکستان کی محبت میں ہندوستان کو چھوڑ کر پاکستان آ گئے، آج ہم اپنے شعبے میں مہارت رکھنے والے اس صدی کے سب سے بڑے آدمی کو ہم یاد کررہے ہیں۔ نثار بزمی مشکل ڈائریکٹر تھے۔سینئر اداکار مصطفی قریشی نے کہا کہ جو آرٹسٹ ان دنیا سے چلے گئے ہیںوہ احمدشاہ کی وجہ سے سب کے دلوں میں زندہ ہیں ، میں التجا کروں گا جس طرح ہم آج نثار بزمی کویاد کر رہے ہیں اسی طرح ہمارے جتنے میوزک کمپوزر ہیں ان کو بھی یاد کیا جائے میں آج جس مقام پر ہوں اس میں نثار بزمی کا بڑا ہاتھ ہے،میری پہلی فلم میں اگر نثار بزمی صاحب کا میوزک نہ ہوتا تو وہ فلم کبھی بھی سپر ہٹ نہیں ہوتی ،جب فلم ہٹ ہوئی تو میں بھی ہٹ ہوا، نثار بزمی کا ہمارا میوزک انڈسٹری میں بہت بڑا کردار تھا،نثار بزمی بر صغیر کے بہت بڑے کمپوزر تھے ، تنویراحمد آفریدی نے کہا کہ لیجنڈ کبھی مرتا نہیں ہے ہمیشہ زندہ رہتا ہے ، ”کون یادوں کو زنجیر پہنائے گا“ چار سو صفحات پر مشتمل ہے ، اس کتاب سے شائع ہونے سے لیکر اس تقریب کے اہتمام تک تمام کام محمد احمد شاہ کے توسط سے ہوا ہے ، یہ نثار بزمی کے لیے احمد شاہ کی محبت ہے،امجد شاہ نے کہا کہ تنویر احمد آفریدی نے آج ثابت کردیا ہے کہ وہ واقع نثار بزمی کے شاگرد ہیں کیا کوئی ایسا موسیقار بر صغیر میں ہو سکتا ہے جس کے تمام گانے سپر ہٹ ہوں ،نثاربزمی کے تمام گانے سپر ہٹ تھے ، میں نےان سے سیکھا ہے کہ وہ راگ کے معاملے میں کبھی بھی ضد کو پسند نہیں کرتے تھے ،ممتازبیگم نے کہا کہ نثار بزمی ہماری انڈسٹری کے لیجنڈ اور بہت عمدہ آرٹسٹ تھے ، میں نثار بزمی کی فین تھی ۔وہ آج ہمارے بیچ نہیں لیکن ایسا لگتا ہے کہ وہ یہی ہمیں دیکھ رہے ہیں سن رہے ہیں، تقریب میں اخلاق بشیر،ممتاز بیگم،نعمان خان، حسن جہانگیر ،تنویراحمد آفریدی، روز میری،آیت شیخ، وحید خیال، عروسہ علی،عائشہ، فیصل لطیف، شبانہ کوثر، صدف منیر، زبیر یوسفی ،سلمان علوی اور عارف انصاری نے نثار بزمی کے صدابہار گیت گاکر انہیں خراج عقیدت پیش کیا ، جبکہ محبوب اشرف بینڈ کی زبردست پرفارمنس نے شرکاءکو محظوظ ہونے پر مجبور کر دیا۔
