اسلام آباد، 30 دسمبر، 2024 –
52ویں کامن ٹریننگ پروگرام کے زیر تربیت افسران کے ایک گروپ نے آج (پیر) کو وزارت قانون و انصاف کا دورہ کیا۔ زیر تربیت افسران کایہ دورہ پیشہ ورانہ تربیت کے ایک حصے کے طور پر تھا وزارت کے دورہ کے دوران زیر تربیت افسران کے گروپ نے وزیر قانون و انصاف سینیٹر اعظم نذیر تارڑ سے ملاقات کی، جنہوں نے پاکستان میں قانون کی حکمرانی کو بڑھانے کے لیے وزارت کے وژن اور عزم کے بارے میں تبادلہ خیال کیا۔ اجلاس میں سیکرٹری قانون و انصاف راجہ نعیم اکبر، ایڈیشنل سیکرٹری اویس نعمان کنڈی اور سینئر جوائنٹ سیکرٹری مسز زینت احمد بھی موجود تھیں۔
اس دورے میں وزارت کے متنوع کاموں، بشمول جانچ، ڈرافٹنگ، سالیسیٹر، اور قانون سازی کے کردار بارے تفصیلی بریفنگ شامل تھی۔ سیکرٹری قانون و انصاف، راجہ نعیم اکبر نے کلیدی قانونی فریم ورک کے بارے میں تفصیلی پریزنٹیشن فراہم کی، جس میں صارفین کے تحفظ کے قوانین کو مضبوط بنانے اور حقوق ملکیت دانش کو آگے بڑھانے میں وزارت کی کوششوں کو اجاگر کیا گیا۔ پروبیشنرز نے قانون سازی کے عمل کی پیچیدگیوں اور ملک کے قانونی ڈھانچے کی تشکیل میں قانونی مسودے کے کردار کا بھی جائزہ لیا۔ سیشن کا ایک اہم حصہ فوجداری قانون میں جاری اصلاحات کے لیے وقف تھا، جس کا مقصد شہریوں کے لئے انصاف کے زیادہ موثر نظام کی تشکیل ہے۔ زیرتربیت افسران کو قانونی طریقہ کار کو جدید بنانے اور تمام شہریوں کے لیے انصاف تک رسائی کو یقینی بنانے کے لیے وزارت کے اسٹریٹجک اقدامات کے بارے میں بتایا گیا۔
یہ دورہ زیرتربیت افسران کے لیے وزارت کی کارروائیوں اور پالیسی کی تشکیل اور عمل درآمدمیں اس کے اہم کردارکو جامع طورپر سمجھنے کا نادر موقع تھا۔ بریفنگ میں انصاف اور احسن طرز حکمرانی کے اصولوں کو برقرار رکھنے کے لیے مختلف سرکاری محکموں کے درمیان تعاون کی اہمیت پر بھی زور دیا گیا۔
