پریس ریلیز
لاہور، 28 دسمبر: پارلیمانی سیکرٹری برائے انسانی حقوق و اقلیتی امور، سونیا عاشر نے ڈسٹرکٹ سیالکوٹ جیل کا دورہ کیا جہاں انہوں نے مسیحی قیدیوں میں کرسمس کی خوشیوں کا حصہ بننے کے لیے کیک اور تحائف تقسیم کئے۔ انہوں نے قیدیوں کو مقدس بائبل کا تحفہ بھی پیش کیا تاکہ انہیں روحانی سکون مل سکے اور ان کی ہمت افزائی ہو سکے۔ اس موقع پر سونیا عاشر نے قیدیوں کے ساتھ ملاقات کی اور ان کے مسائل سنے۔ قیدیوں نے اپنے مسائل اور ضروریات کا ذکر کیا جس پر پارلیمانی سیکرٹری نے موقع پر ہی متعلقہ حکام کو ہدایات دیں اور مسائل کے حل کی یقین دہانی کرائی۔ انہوں نے کہا کہ حکومت اقلیتی برادری کے حقوق کے تحفظ کے لیے ہمیشہ کوشاں ہے اور اس نوعیت کی ملاقاتیں اس بات کا ثبوت ہیں کہ ہمیں ان کی فلاح و بہبود کا خیال ہے۔ انکا کہنا تھا کہ یہ دورہ پنجاب حکومت کی جانب سے اقلیتی حقوق کے تحفظ اور انسانیت کے اصولوں کے مطابق اقدامات کرنے کے عزم کا عکاس ہے۔
سونیا عاشر نے مزید کہا کہ کرسمس ایک ایسا موقع ہے جب ہمیں سب کے ساتھ محبت اور احترام کا پیغام بانٹنا چاہیے، اور ان قیدیوں کو بھی یہ احساس دلایا کہ وہ معاشرتی فلاح و بہبود میں حصہ دار ہیں۔ انہوں نے کہا کہ حکومت آئندہ بھی اس طرح کے اقدامات جاری رکھے گی تاکہ تمام قیدیوں کی اصلاح اور فلاح کے لیے بہتر ماحول فراہم کیا جا سکے۔سونیا عاشر کے ہمراہ اس دورے پر پاسٹر عارف یوسف، پاسٹر سونیتا عارف، ندیم جیمز، ذوالفقار غوری (سابق رکن پنجاب اسمبلی)، نعیم قیصر، وجیہہ قیصر، پاسٹر سرفراز بھٹی اور محکمہ انسانی حقوق سے محمد فیصل بھی موجود تھے۔
