کراچی پریس کلب کے سالانہ انتخابات: دی ڈیمو کریٹس پینل کا ایک بار پھر کلین سوئپ
کراچی پریس کلب کے سالانہ انتخابات میں ’دی ڈیمو کریٹس پینل‘ نے ایک بار پھر کلین سوئپ کرلیا اور 12 نشستوں پر بھر پور کامیاب حاصل کر لی ہے۔ دی ڈیموکریٹس پینل نے مسلسل 17ویں مرتبہ کلین سویپ کیا ہے۔
تفصیلات کے مطابق سالانہ انتخابات کیلئے پولنگ آج 28دسمبر بروز ہفتہ صبح 9 تاشام6 بجے تک بغیر کسی وقفے کے کراچی پریس کلب میں جاری رہی، دی ڈیموکریٹس پینل اور آزاد امیدواروں نے انتخابات میں حصہ لیا ہے۔ ہفتہ کی صبح سے شام تک ہونے والی پولنگ میں انتہائی جوش وخروش دیکھنے میں آیا۔پریس کلب کے ممبران کی ایک بڑی تعداد نے انتخابی عمل میں حصہ لیا ہے۔ کراچی پریس کلب الیکشن کمیٹی نے انتخابی نتائج کا اعلان کیا ہے۔
جاری کردہ نتائج کے مطابق’دی ڈیمو کریٹس پینل‘ سے صدر کے امیدوار فاضل جمیلی 560ووٹ لیکر کامیاب قرار پائے جبکہ ان کے مدمقابل آزاد امیدوار ایوب جان سرہندی نے273 ووٹ حاصل کیے۔ دی ڈیمو کریٹس پینل سے نائب صدر کی نشست پر ارشاد کھوکھرپہلے ہی بلامقابلہ منتخب ہوچکے ہیں۔خزانچی کے عہدے پر دی ڈیمو کریٹس کے عمران ایوب 668 ووٹ لیکر کامیابی حاصل کی اور ان کے مدمقابل آزاد امیدوار آفتاب حسین 149ووٹ حاصل سکے ۔سیکرٹری کی نشست کیلئے دی ڈیموکریٹس کے محمد سہیل افضل خان604 ووٹ لیکر کامیاب قرار پائے جبکہ ن کے مد مقابل آزاد امیدوار قمر رضوی237 نے ووٹ حاصل کیے۔ اور جوائنٹ سیکرٹری کے عہدے پر دی ڈیموکریٹس کے محمد منصف 688و وٹ لیکرکامیاب ہوئے جبکہ ان مد مقابل آزاد امیدوار سعید انور خان بونیری 119ووٹ حاصل کر سکے۔
اسی طرح دی ڈیمو کریٹس پینل نے گورننگ باڈی کی تمام 7 نشستوں پر اپنے مدمقابل آزاد امیدواروں کو کلین سوئپ کیا ہے۔ چیف الیکشن کمیٹی کے حتمی نتائج کے مطابق دی ڈیمو کریٹس پینل کے عبدالحفیظ بلوچ نے741 ووٹ،کفیل احمد733 ووٹ ، میمونہ صدیقی (مونا صدیقی)722ووٹ، محمد فاروق 722ووٹ،حماد حسین719 ووٹ، منظور شیخ682 ووٹ اورقاضی محمد یاسر679 نے ووٹ لیکر گورننگ باڈی کی نشستوں پر کامیاب قرار پائے ہیں۔جبکہ آزاد امیدوار سید عتیق احمد 261ووٹ اور قاضی ناصر الدین138 ووٹ حاصل کرسکے ہیں۔
کراچی پریس کلب کے سالانہ انتخابات کیلئے حسب روایت ووٹ ڈالنے کیلئے کلب کا کارڈ دکھانا لازمی قرار دیا گیا تھا۔کراچی پریس کلب کے سالانہ انتخابات میں 1507 میں سے 871 اراکین نے انتخابی عمل میں اپنا حق رائے دہی استعمال کیا ہے۔ پولنگ کا آغاز صبح 9 بجے ہوا جو بلا کسی وقفہ کے شام 5 بجے تک جاری رہی۔
واضح رہے کہ کراچی پریس کلب کے 1958 میں اپنے قیام سے آج تک ہر سال باقاعدگی سے انتخابات منعقد ہو تے رہے ہیں۔
===================
خبرنامہ نمبر 9102/2024
کوئٹہ، 28 دسمبر
وزیر اعلیٰ بلوچستان میر سرفراز بگٹی نے کراچی پریس کلب کے سالانہ انتخابات میں کامیاب ہونے والے تمام عہدیداروں کو دلی مبارکباد پیش کی ہے اور ان کے لیے نیک خواہشات کا اظہار کیا ہے۔ اپنے تہنیتی بیان میں انہوں نے انتخابات میں “دی ڈیموکریٹس” پینل پر صحافتی برادری کے اعتماد کو جمہوری عمل کا حصہ قرار دیا ہے اور امید ظاہر کی کہ نئی قیادت صحافیوں کے مسائل کے حل اور آزادی صحافت کے فروغ میں نمایاں کردار ادا کرے گی۔ وزیر اعلیٰ نے صدر فاضل جمیلی، جنرل سیکریٹری محمد سہیل افضل خان، جوائنٹ سیکریٹری محمد منصف، خزانچی عمران ایوب، اور گورننگ باڈی کے منتخب ارکان حفیظ بلوچ، حماد حسین، کفیل احمد، مونا صدیقی، منظور شیخ، اور محمد فاروق کو خصوصی طور پر مبارکباد دی انہوں نے کہا کہ صحافت جمہوریت کا ستون ہے، اور کراچی پریس کلب کی نئی قیادت اپنی پیشہ ورانہ ذمہ داریوں کو بہترین انداز میں نبھائے گی۔ میر سرفراز بگٹی نے بلوچستان اور کراچی کے صحافیوں کے درمیان تعاون کے فروغ کی امید ظاہر کرتے ہوئے ہر ممکن تعاون کی یقین دہانی بھی کرائی۔
ترجمان حکومت بلوچستان شاہد رند کی کراچی پریس کلب کے نومنتخب عہدیداروں کو مبارکباد
کوئٹہ ، 28 دسمبر
ترجمان حکومت بلوچستان شاہد رند نے کراچی پریس کلب کے سالانہ انتخابات میں کامیاب ہونے والے عہدیداروں کو دلی مبارکباد پیش کرتے ہوئے ان کے لیے نیک تمناؤں کا اظہار کیا ہے۔ اپنے پیغام میں انہوں نے دی ڈیموکریٹس کے بھرپور کامیابی پر کراچی کی صحافتی برادری کو خراجِ تحسین پیش کیا اور کہا کہ یہ کامیابی شفافیت، جمہوری اقدار اور صحافیوں کے اتحاد کی عکاس ہے۔ شاہد رند نے صدر فاضل جمیلی، جنرل سیکریٹری محمد سہیل افضل خان، جوائنٹ سیکریٹری محمد منصف، خزانچی عمران ایوب، اور گورننگ باڈی کے منتخب ارکان حفیظ بلوچ، حماد حسین، کفیل احمد، مونا صدیقی، منظور شیخ، اور محمد فاروق کو مبارکباد دیتے ہوئے کہا کہ وہ امید کرتے ہیں کہ یہ ٹیم صحافیوں کے حقوق کے تحفظ اور ادارے کی روایات کو برقرار رکھنے میں اہم کردار ادا کرے گی۔انہوں نے مزید کہا کہ کراچی پریس کلب کی تاریخ میں یہ نیا باب مثبت پیش رفت کا سبب بنے گا، اور بلوچستان کی حکومت صحافتی اداروں کے ساتھ ہر ممکن تعاون جاری رکھے گی تاکہ ملک بھر میں صحافت کی آزادی اور استحکام کو یقینی بنایا جا سکے۔
