تحریر: سہیل دانش
انسان کی کامیابی کا راز کیا ہے یہ میرا پسندیدہ سبجیکٹ ہے میں نے اپنے زمانہ طالبن علمی اور عملی زندگی میں دنیا کے تقریباً تمام کامیاب لوگوں کی بائیوگرافیز پڑھ ڈالی ہیں بے شمار کامیاب لوگوں سے ملا اور اِن کی کامیابی کے راز بھی جمع کرتا رہا۔ یہ میرے لئے ایک اسٹڈی کیس رہا ہے۔ کامیاب انسان اور ناکام انسان میں کیا فرق ہوتا ہے کامیاب لوگ چست اور چابکدست ہوتے ہیں۔ یہ پوری زندگی نئی نئ چیزیں سیکھتے رہتے ہیں یہ لوگ چھپڑ پھٹنے کا انتظار نہیں کرتے بلکہ یہ اپنا چھپڑ بناتے ہیں۔ اپنی لاٹری ایجاد کرتے ہیں ان لوگوں کی زندگی چیلنجز اور رسک کے گرد گھومتی ہے یہ سر بھی ڈھانپتے ہیں اور پاؤں بھی چھپانے کا بندوبست کرتے ہیں یہ کم پر راضی نہیں ہوتے یہ ناکامیوں پر دل نہیں ہارتے یہ آخری سانس تک اسٹرگل کرتے ہیں یہ محنت اور کام کو عبادت کا درجہ دیتے ہیں، یہ اپنے کام میں کبھی ڈنڈی نہیں مارتے یہ عموماً جلدی غصے میں نہیں آتے یہ زیادہ تر مزاج کے دھیمے ہوتے ہیں یہ ضد اور ہٹ دھرمی سے پرہیز کرتے ہیں اُتار چڑھاؤ اور نشیب و فراز زندگی کا حصہ ہے اِس میں اپنے ہنر اور جوہر سے خود کو منوانے کی صلاحیت پیدا کرلیتے ہیں۔ وہ ہمارے معاشرے کے اسٹار ہوتے ہیں۔ اِس اسٹڈی میں مجھے معلوم ہوا کہ انسان کی عادتیں اُس کے حالات بدل دیتی ہیں یہ انسان کا ارادہ اور ٹیکنک ہی ہوتی ہے جو اُسے دوسروں سے منفرد بناتی ہیں کامیاب شخص اپنا زیادہ تر ٹائم اپنے کام اپنے کاز اور اپنے پروفیشن کو دیتا ہے اور یاد رکھیں کامیاب لوگوں کا ٹیلنٹ اُن کا پروفیشن ہوتا ہے اُنہیں یقین ہوتا ہے دنیا میں جو کام ایک شخص کرسکتا ہے وہ کام دنیا کے باقی سات ارب لوگ بھی کرسکتے ہیں کیونکہ یہ کام ناممکن ہوتا تو پہلا انسان بھی نہ کرپاتا یہ حقیقت ہے کہ بعض کام بعض لوگوں کے لئے آسان اور دوسروں کے لئے مشکل ہوتے ہیں لیکن ناممکن کسی کے لئے نہیں ہوتے اور ساتھ ساتھ کامیابی ایک ذائقہ اور ایک ٹیسٹ ہوتا ہے۔ انسان اگر ایک بار یہ ذائقہ چکھ لے تو پھر یہ اپنی زندگی میں ناکامیوں کا زہر نہیں گھلنے دیتا۔ اللہ کا کرم اور محنت انسان کا وہ اثاثہ ہیں۔ جسے دنیا کی کوئی طاقت آپ سے نہیں چھین سکتی کیونکہ دنیا کی دس ہزار سال کی ریکارڈ ہسٹری میں آج تک کوئی شخص کسی دوسرے شخص سے محنت کرنے اور اللہ سے دُعا کرنے کا حق نہیں چھین سکا، محنت زندگی کا وہ عطیہ ہے جس کے ذریعے انسان پتھر کو ہیرا اور ہیرے کو شیشہ بناسکتا ہے۔ اور اللہ کا کرم وہ طاقت جو نمرود کی آگ کو بھی گلزار بنادیتی ہے ہر انسان کو محنت اور اللہ کے کرم کو اپنا سہارا بنانا چاہئے۔ یقین کیجئے دنیا کی کوئی طاقت آپکو کامیابی کی چوٹی تک پہنچنے سے نہیں روک سکتی۔ آپ یقین جانیں آرٹس کونسل کے صدر جناب احمد شاہ کی کامیابیاں دیکھ کر مجھے اپنے تھیسس کے دُرست ہونے کا یقین آگیا۔ احمد شاہ صاحب سچ مچ صلاحیتوں اور فن و ہنر کا البم ہیں۔ انتخابات میں گہما گہمی میں مجھے امیتابھ بچن کا یہ ڈائیلاگ یاد آرہا تھا۔ “ہم جہاں کھڑے ہوجاتے ہیں لائن وہیں سے شروع ہوتی ہے”۔ ساتھ اُن کی گذشتہ روز کی کامیابی کے بعد مجھے اسکواش کے شہرہ آفاق کھلاڑی جیف ہنٹ کی یہ بات یاد آرہی ہے۔ اُنہوں نے کئی سال قبل جہانگیر خان کو خراج تحسین پیش کرتے ہوئے کہا تھا خبر یہ نہیں کہ جہانگیر خان جیت گیا۔ خبر یہ ہوگی جہانگیر خان ہارگیا۔
