کیڈٹ کالج وارسک میں یومِ والدین کی پروقار تقریب کا انعقاد کیا گیا، جس میں بڑی تعداد میں کیڈٹس کے والدین کے ساتھ عسکری اور سول حکام نے بھی شرکت کی۔ تقریب کے مہمان خصوصی کور کمانڈر پشاور تھے، جنہیں کیڈٹس کے چاق و چوبند دستے نے سلامی پیش کی۔
مہمان خصوصی نے طلباء سے خطاب کرتے ہوئے کہا کہ طلباء اپنی تمام تر توانائی اعلیٰ تعلیم کے حصول پر مرکوز کریں۔ اس موقع پر نصابی اور غیر نصابی سرگرمیوں میں نمایاں پوزیشن حاصل کرنے والے کیڈٹس میں انعامات اور ٹرافیاں بھی تقسیم کی گئیں۔ اعلیٰ کارکردگی کے لیے کیڈٹ عکاشہ بنگش نے پہلی اور کیڈٹ عزیر رحمان نے دوسری پوزیشن حاصل کی۔
تقریب کے دوران جمناسٹک، گھڑسواری اور دیگر سرگرمیوں کا عملی مظاہرہ بھی پیش کیا گیا۔ کیڈٹ کالج وارسک کا قیام 2009 میں عمل میں آیا اور یہ ادارہ اپنے تعلیمی معیار کے لیے ملک میں نمایاں مقام رکھتا ہے۔ کالج سے فارغ التحصیل طلباء ملک کے مختلف شعبہ ہائے زندگی میں اپنی صلاحیتوں کا لوہا منوا رہے ہیں۔
