بھارتی ریاست آسام میں راجدھانی ایکسپریس ایک ہاتھیوں کے جھنڈ سے ٹکرا گئی جس کے نتیجے میں کم از کم آٹھ ہاتھی ہلاک اور ایک ہاتھی کا بچہ زخمی ہو گیا۔
بھارتی میڈیا کے مطابق حادثے کے بعد ٹرین کی انجن سمیت پانچ بوگیاں پٹری سے اتر گئیں تاہم کسی مسافر کے زخمی ہونے کی اطلاع نہیں ہے۔
بھارتی ریلوے حکام کے مطابق یہ حادثہ تقریباً گزشتہ رات 2 بج کر 17 منٹ پر پیش آیا جب ٹرین آسام کے ہوجائی علاقے سے گزر رہی تھی۔
اس دوران ہاتھیوں کا ایک جھنڈ اچانک ریلوے پٹری پر آ گیا، پائلٹ نے ہاتھیوں کو بچانے کے لیے ایمرجنسی بریک لگائی لیکن تیز رفتاری کے سبب ٹرین ہاتھیوں سے ٹکرا گئی۔
بھارتی میڈیا کا کہنا ہے کہ بھارتی جنگلاتی محکمے کے افسران نے تصدیق کی ہے کہ حادثے میں آٹھ ہاتھی ہلاک ہوئے جبکہ ایک زخمی بچے کو بچا لیا گیا ہے۔
