آسٹریلیا کے شہر سڈنی کے بونڈائی بیچ پر فائرنگ کے واقعے کے کچھ دن بعد آسٹریلوی شہر برسبین میں ایک مسجد کی بےحرمتی کی گئی ہے۔
غیرملکی میڈیا کے مطابق شمالی برسبین کے مضافاتی علاقے بالڈ ہلز میں مسجد تقویٰ کی دیوار پر اسپرے سے اسلامو فوبک تحریر لکھی گئی۔
مقامی پولیس کے مطابق 17 اور 18 دسمبر کی صبح نامعلوم شخص نے مسجد کی دیوار پر مغلظات لکھے۔
مقامی پولیس نے اس واقعے سے متعلق معلومات فراہم کرنے کے بارے میں عوام سے اپیل بھی کی ہے۔
مسجد کی انتظامیہ نے اس واقعے کو تکلیف اور تشویش کا باعث قرار دیا ہے۔
مسجد کے امام عبدالسالک نے کہا ہے کہ کمیونٹی اس واقعے سے بہت غمزدہ اور پریشان ہے۔ ہمارا پیغام غصے کا نہیں بلکہ اتحاد اور یقین دہانی کا ہے۔ یہ مسجد ہمیشہ آسٹریلوی معاشرے میں امن، خدمت اور مثبت شراکت کا باعث بنی رہی۔
