آسٹریلیا میں سڈنی کے نواح میں ایک افسوسناک فضائی حادثہ پیش آیا جہاں دورانِ پرواز دو طیارے آپس میں ٹکرا گئے، جس کے نتیجے میں ایک طیارہ تباہ اور اس کا پائلٹ جاں بحق ہوگیا۔
میڈیا رپورٹس کے مطابق حادثہ ویڈر برن ایئر فیلڈ کے قریب پیش آیا۔ ٹکراؤ کے بعد ایک طیارہ قریبی جھاڑیوں میں گر کر مکمل طور پر تباہ ہوگیا، جبکہ ریسکیو ٹیموں نے موقع پر پہنچ کر ملبے سے پائلٹ کی لاش برآمد کرلی۔
ابتدائی معلومات کے مطابق دونوں طیارے فضا میں ایک دوسرے سے ٹکرائے۔ حادثے کے بعد دوسرا طیارہ بحفاظت ایئر فیلڈ پر اتر گیا اور اس کا پائلٹ محفوظ رہا۔ واقعے کے بعد علاقے کے دو مختلف مقامات کو کرائم سین قرار دے کر سیل کردیا گیا، جبکہ ایئر ٹرانسپورٹ سیفٹی بیورو نے حادثے کی تحقیقات شروع کردی ہیں۔























