ایشیئن کپ کوالیفائرز،
شام نے پاکستان کو پانچ گول سے شکست دے دی
کوالیفائرز کے سلسلے کا25 مارچ کو سعودی عرب میں ہونے والےمیچ میں بھی پاکستان شام سے 2 گول سے ہار چکا ہے
اسلام آباد( رپورٹ۔محمد اقبال ہارپر)اے ایف سی ایشیئن کپ 2027 سعودی عریبیہ کوالیفائرز گروپ ای کے سلسلے میں پاکستان اور شام کے درمیان کھیلے گۓ میچ میں شام نے پاکستان کو پانچ گول سےہرا دیا۔جناح اسٹیڈیم میں گروپ ای کے اس میچ کی میزبان ورلڈ رینکڈ 198 پاکستان اور 86 رینکڈ شام کے درمیان دوپہر 2 بجے میچ کا آغاذ بڑی گرم جوشی سے ہوا۔پہلے ہاف کے اختتام پر اسکور ایک صفر تھا۔دوسرے ہاف میں دونوں ٹیموں نے ایک دوسرے کی گول پوسٹ پر تابڑ توڑ حملے کیۓ جس پر پاکستانی ٹیم فائدہ نہ اٹھا سکی شام کے کھلاڑی دوسرے ہاف میں چار گول کرنے میں کامیاب ہوگۓ یوں یہ میچ پانچ صفر کے اسکور پر اختتام پزیر ہوا۔پاکستان کا مقابلہ ایک مضبوط حریف سے تھا پاکستانی کھلاڑیوں نے بھی مجموعی طور پر اچھے کھیل کا مظاہرہ کیا۔
اس سے قبل دونوں ٹیموں کا ٹاکرہ 25 مارچ کو پرنس عبداللہ بن جلاوی اسٹیڈیم الحصا سعودی عرب میں ہوا تھا جس میں پاکستان کو 2 گول سے شکست ہوئی تھی پاکستانی ٹیم گول کرنے میں ناکام رہی۔ایشیئن کپ 2027ء کیلۓ کوالیفائی کرنے کے لیۓ پاکستان کے چانسز نہ ہونے کے برابر ہیں لیکن کوالیفائنگ راؤنڈ میچز روٹین کا حصہ ہیں یہ راؤنڈ کھیلنے سے پاکستانی کھلاڑیوں کے گیم لیول اور تجربہ میں اضافہ ضرور ہو گا۔پاکستان فٹبال کے حوالے سے گزشتہ کئی عشروں سے زوال پزیر ہے ورلڈ رینکنگ میں 198 نمبر پر ہونے کے باوجود پاکستان فٹبال فیڈریشن کی حکمرانی کے چکر میں اقتدار کے لالچی ٹولوں نے فٹبال کو تباہ کر کے رکھ دیا۔اور مفادات کے حصول کا یہ سلسلہ ہنوز جاری ہے ( شرم مگر تم کو آتی نہیں)۔
