سونی پیکچرز نے مقبول کھلونا لابوبو ڈول پر مبنی فلم بنانے کا منصوبہ شروع کر دیا ہے، یہ فلم بچوں اور بڑوں دونوں کے لیے دلچسپ اور تفریحی مناظر پیش کرے گی۔
رپورٹ کے مطابق لابوبو وہ کردار ہے جو ہانگ کانگ کے مصور کیسنگ لونگ نے 2015 تخلیق کیا اور اسے چینی کمپنی پاپ مارٹ نے مارکیٹ کیا، یہ کھلونا خاص طور پر بلائنڈ باکس فارمیٹ میں فروخت ہوتا ہے، یعنی خریدار کو معلوم نہیں ہوتا کہ کون سا ماڈل ملے گا، اور یہی وجہ ہے کہ اس کی ایک کلکٹر مارکیٹ بن چکی ہے۔
لابوبو ڈول عالمی سطح پر مشہور ہو چکا ہے، اور مشہور شخصیات جیسے ریحانہ اور بلیک پنک کی لیسا نے اسے اپنی پذیرائی دی ہے، جس سے اس کی مقبولیت میں اضافہ ہوا۔
سونی پیکچرز کے مطابق یہ فلم ممکنہ طور پر فرنچائز کا آغاز ثابت ہو سکتی ہے، اور اگر کامیاب ہوئی تو مستقبل میں لابوبو ڈول پر مزید فلمیں بنائی جا سکتی ہیں۔
واضح رہے کہ ابھی تک یہ اعلان نہیں کیا گیا کہ فلم لائیو ایکشن ہوگی یا اینیمیٹڈ، تاہم ابتدائی منصوبہ بندی اور تیاری کا کام جاری ہے اور امکان ہے کہ جلد ہی ریلیز کی تاریخ بھی جاری کر دی جائے گی۔
