ٹک ٹاک نے پاکستانی کریئیٹرز کے لیے نئے حفاظتی اور پیداواری ٹولز متعارف کرا دیے ہیں، تاکہ پلیٹ فارم پر صارفین کے تجربے کو محفوظ، مثبت اور مؤثر بنایا جا سکے۔
کمپنی کے مطابق یہ نئے فیچرز خاص طور پر پاکستانی صارفین کے لیے ڈیزائن کیے گئے ہیں تاکہ وہ اپنے مواد کو بہتر انداز میں منظم کر سکیں اور منفی تجربات سے محفوظ رہیں۔
ٹک ٹاک کے نئے فیچرز میں سب سے اہم کریئیٹر کیئر موڈ ہے، جو تبصروں میں ہراسگی، بدسلوکی یا نامناسب الفاظ کو خود بخود فلٹر کر دیتا ہے، اس کے تحت وہ تبصرے بھی پوشیدہ رہیں گے جو پہلے کریئیٹرز نے رپورٹ یا حذف کیے ہوں، اس فیچر کا مقصد یہ ہے کہ مواد بنانے والے افراد بغیر کسی خوف یا دباؤ کے اپنی تخلیقی صلاحیت کا بھرپور استعمال کر سکیں۔
اسی طرح کانٹینٹ چیک لائٹ بھی متعارف کرایا گیا ہے، جو ٹک ٹاک اسٹوڈیو کے ذریعے دستیاب ہے، اس فیچر کی مدد سے کریئیٹرز اپنے ویڈیوز پوسٹ کرنے سے پہلے ممکنہ پابندیوں یا قوانین کی جانچ کر سکتے ہیں اور اپنی ویڈیوز میں ضروری ترامیم کر کے انہیں محفوظ طریقے سے شیئر کر سکتے ہیں۔
ٹک ٹاک نے کریئیٹر ان باکس بھی لانچ کیا ہے، جو پیغام رسانی کا نیا پیشہ ورانہ ہب ہے، اس میں نئے فولڈرز جیسے “Unread” اور “Starred” شامل ہیں، اور کریئیٹرز کو فوری جوابات دینے کے لیے ٹیمپلیٹس بھی دستیاب ہوں گے، تاکہ وہ اپنے سامعین کے ساتھ بہتر رابطہ قائم کر سکیں۔
ٹک ٹاک کے مطابق یہ تمام اقدامات پاکستانی کریئیٹرز کی حفاظت، پیداوری اور پلیٹ فارم کے مثبت استعمال کو فروغ دینے کے لیے کیے گئے ہیں، کمپنی کا مقصد یہ ہے کہ پاکستان میں ایک ایسا ڈیجیٹل ماحول فراہم کیا جائے جہاں صارفین بلا خوف و خطر اپنی تخلیقی صلاحیتوں کا اظہار کر سکیں اور سوشل میڈیا کا محفوظ تجربہ حاصل کر سکیں۔
