پریس ریلیز
کراچی 09نومبر ۔کراچی میں تین روزہ پاکستان گرین اینڈ ریزیلینٹ بلڈنگ کانفرنس 2025 اختتام پذیر ہوگئی، جس میں وفاقی و صوبائی محکموں، نجی شعبے، مالیاتی اداروں اور ترقیاتی تنظیموں کے نمائندگان نے بھرپور شرکت کی۔
کانفرنس کا مقصد ملک میں پائیدار، توانائی کے لحاظ سے مؤثر اور ماحول دوست تعمیرات کے فروغ کے لیے عملی حکمتِ عملیوں اور پالیسی تجاویز پر اتفاق رائے پیدا کرنا تھا۔
وزارتِ موسمیاتی تبدیلی و ماحولیاتی ہم آہنگی کی سیکریٹری عائشہ موریانی نے افتتاحی اجلاس سے خطاب کرتے ہوئے حکومتِ پاکستان کی جانب سے کیے گئے اہم اقدامات پر روشنی ڈالی۔ انہوں نے کہا کہ پاکستان گرین بلڈنگ کوڈ 2023، گرین ٹیکسانومی اور کلائمٹ رسک اسکریننگ گائیڈ لائنز 2024 پائیداری کو قومی ترقیاتی منصوبہ بندی کا لازمی جزو بنانے کے لیے سنگ میل ثابت ہوں گی۔
تقریب کے دوران ایج ایوارڈز (EDGE Awards) بھی منعقد کیے گئے جن میں توانائی و وسائل کے مؤثر استعمال کے حوالے سے نمایاں کارکردگی دکھانے والے منصوبوں اور اداروں کو سراہا گیا۔
چیئرمین پلاننگ اینڈ ڈیولپمنٹ بورڈ جناب نجم احمد شاہ نے بطور مہمانِ خصوصی تقریب میں شرکت کی اور اُن کمپنیوں کو ایوارڈز پیش کیے جنہوں نے ماحول دوست اور توانائی مؤثر تعمیرات کے فروغ کے لیے ایج (EDGE) سرٹیفکیشن حاصل کی
ایج سرٹیفکیشن حاصل کرنے پر جن اداروں کو اعزازات دیے گئے ان میں او جی ڈی سی (OGDC)، زمین ڈویلپمنٹ، الائیڈ بینک، صفیہ ہومز (انصار مینجمنٹ کمپنی)، موڈیولس گرین ہومز، ایچ بی ایل مائیکروفنانس بینک، سیرینا ہوٹلز اور حبیب یونیورسٹی شامل ہیں۔
تقریب کے مہمانِ خصوصی ڈائریکٹر جنرل سندھ بلڈنگ کنٹرول اتھارٹی (SBCA) مزمل حسین ہالیپوٹو نے اپنے خطاب میں کہا کہ حکومتِ سندھ تعمیراتی قوانین میں گرین بلڈنگ اور ماحول دوست پالیسیوں کو شامل کرنے کے لیے عملی اقدامات کر رہی ہے۔
انہوں نے کہا کہ ’’پائیدار تعمیرات کا فروغ نہ صرف موسمیاتی خطرات میں کمی کا باعث بنے گا بلکہ شہری ترقی کو بھی مضبوط بنیادوں پر استوار کرے گا۔‘‘
ڈی جی ایس بی سی اے نے وزارتِ موسمیاتی تبدیلی، نیشنل انرجی ایفیشنسی اینڈ کنزرویشن اتھارٹی (NEECA) اور عالمی بینک کے نمائندگان کے ساتھ ایک پینل ڈسکشن میں بھی شرکت کی، جس میں پائیدار تعمیرات، مالیاتی معاونت اور عمل درآمد کے مؤثر طریقہ کار پر تفصیلی گفتگو کی گئی۔
کانفرنس میں مختلف ماہرین نے پائیدار تعمیرات کے فروغ کے لیے تکنیکی و مالیاتی تعاون کے عزم کا اظہار کیا، جبکہ نئے ماہرین کو ایکسپرٹس پن سرٹیفکیشن کے ذریعے اعزازات دیے گئے۔ موسمیاتی تبدیلی کے خلاف اقدامات میں نوجوانوں کے کردار کو بھی نمایاں طور پر اجاگر کیا گیا۔
کانفرنس کے اختتام پر گرین بلڈنگ مراعات کے موضوع پر ایک اعلیٰ سطحی گول میز اجلاس منعقد ہوا، جس میں حکومتی اداروں، مالیاتی تنظیموں اور نجی شعبے کے نمائندگان نے شرکت کی۔ اجلاس میں پائیدار تعمیرات کے فروغ کے لیے پالیسی و مارکیٹ پر مبنی اقدامات پر تبادلہ خیال کیا گیا۔
کانفرنس کے اختتام کے بعد شرکاء نے انٹرنیشنل فنانس کارپوریشن (IFC) کے بلڈنگ ریزیلینس انڈیکس (BRI) سے متعلق تربیتی ورکشاپس میں حصہ لیا، جن میں ماہرین کو عمارتوں کی پائیداری اور ماحولیاتی خطرات کے مقابلے میں ان کی مضبوطی جانچنے کے جدید طریقوں سے آگاہ کیا گیا.
