کراچی ۔
ضلع ملیر کے دیہی علاقے میں پسماندہ گھرانوں کے 660 بچوں کو معیاری تعلیم کی فراہمی کے لیئے نئی جدید اسکول کی بلڈنگ کا افتتاح کا آج 24 مئی کو ہوگا۔
پبلک پرائیویٹ پارٹنرشپ کی اعلیٰ مثال قائم کرتے ہوۓ گرین کریسنٹ ٹرسٹ (جی سی ٹی) نے یہ اسکول ایجوکیشن سٹی کے قریب سندھ ایجوکیشن فاؤنڈیشن, محمد شفیع ٹرسٹ، اور خدام ایجوکیشن ٹرسٹ کی معاونت سے قائم کیا ہے جو کہ قرب و جوار کے بائیس گھوٹھوں میں رہائش پذیر بچوں کو تعلیمی سہولیات فراہم کرے گا۔
یہ جدید اسکول بلڈنگ محمد شفیع ٹرسٹ کی مکمل مالی معاونت سے تعمیر کی گئی ہے جبکہ اس کے لیئے خدام ایجوکیشن ٹرسٹ نے زمین عطیہ کی ہے۔ سندھ ایجوکیشن فاؤنڈیشن اسکول کے تعلیمی اخراجات مستقل طور پر برداشت کرے گی۔
ابتدائی طور پر اسکول میں قریبی دیہاتوں سے 330 بچوں کا داخلہ ہوگا، اور مستقبل میں دو شفٹوں میں 660 طلبہ کو دسویں جماعت تک تعلیم دی جائے گی۔ ان دیہاتوں میں 10 ہزار سے زائد افراد بستے ہیں، جنہیں معیاری تعلیم کی فراہمی ایک بڑا چلینج ہے۔
ضلع ملیر کے بخشو گوٹھ میں ہونے والی اسکول بلڈنگ کی افتتاحی تقریب کی صدارت متوقع طور پر سندھ کے وزیر بلدیات سعید غنی کریں گے، جبکہ سندھ ایجوکیشن فاؤنڈیشن کے مینیجنگ ڈائریکٹر گہنور علی لغاری بطور مہمان خصوصی اور محمد شفیع ٹرسٹ کے ٹرسٹی میاں امجد حفیظ بطور مہمانانِ اعزازی شرکت کریں گے۔
جی سی ٹی کے چیف ایگزیکٹو آفیسر زاہد سعید نے اس موقع پر اپنے بیان میں کہا:
“الحمدللہ، سندھ میں ناخواندگی کے خاتمے کے لیے ہماری جدوجہد ثمر آور ثابت ہو رہی ہے۔ ان شاءاللہ وہ دن دور نہیں جب ہر بچہ تعلیم یافتہ ہوگا اور پاکستان کا مستقبل روشن تر بنے گا۔”
