کینیڈا میں اٹاوہ میں ہائی کمیشن آف پاکستان اور ٹورنٹو اور وینکوور میں قونصلیٹ جنرل آف پاکستان میں یومِ تشکر کی تقریبات منعقد کی گئیں۔
یومِ تشکر کی تقریبات میں پاکستانی کمیونٹی نے پورے جوش و جذبہ سے شرکت کی۔
یومِ پاکستان, ہائی کمشنر محمد سلیم کا قائداعظم کو خراجِ عقیدت
اٹاوہ میں ہونے والی تقریب میں “آپریشن بنیان مرصوص” اور “معرکۂ حق” کے دوران قوم کے بے مثال اتحاد اور مسلح افواجِ پاکستان کی جرأت و قربانی کو خراجِ تحسین پیش کیا گیا۔
پاکستانی ہائی کمشنر محمد سلیم نے اپنے خطاب میں اس بات پر زور دیا کہ مسئلہ کشمیر اقوامِ متحدہ کی سلامتی کونسل کی قراردادوں اور کشمیری عوام کی خواہشات کے مطابق مذاکرات کے ذریعے حل کیا جانا چاہیے۔
دوسری جانب کینیڈا ٹورنٹو میں یومِ تشکر کی تقریب سے قونصل جنرل آف پاکستان خلیل باجوہ نے خطاب کرتے ہوئے کہا کہ پاکستان امن کا خواہاں ہے تاہم بھارت کی مسلسل جارحیت، خود مختاری کی خلاف ورزیوں اور شہری آبادی کو نشانہ بنانے جیسے اقدامات کے بعد پاکستان کے پاس اپنے دفاع کے سوا کوئی آپشن نہیں تھا اور بھارت کو منہ کی کھانا پڑی۔
تقریب میں قونصل جنرل خلیل باجوہ اور ٹریڈ قونصلر ڈاکٹر التمش نے کمیونٹی کے ساتھ مل کر سبز ہلالی پرچم لہرایا، وینکوور میں قونصلیٹ جنرل آفس میں پاکستان کی جیت کی خوشی میں کیک بھی کاٹا گیا۔
===================
دنیا کی کوئی طاقت پاکستان کو مٹا نہیں سکتی، رضوان سعید شیخ
امریکا میں پاکستانی سفیر رضوان سعید شیخ کا کہنا ہے کہ دنیا کی کوئی طاقت پاکستان کو مٹا نہیں سکتی۔
واشنگٹن میں یوم تشکر کے موقع پر خطاب کرتے ہوئے انہوں نے کہا کہ خطے میں کشیدگی کے اثرات سے عالمی برادری بخوبی واقف ہے۔
رضوان سعید شیخ کا کہنا تھا کہ امریکی قیادت نے کشیدگی میں کمی لانے کے لیے نمایاں کردار ادا کیا، واقعاتی شواہد سے ظاہر ہوتا ہے پہلگام کا اسکرپٹ پہلے سے لکھا جا چکا تھا۔
انہوں نے کہا کہ بھارتی حکمران علاقائی تسلط کی دیرینہ خواہش کا برملا اظہار کرتے رہے ہیں، بھارتی پارلیمنٹ میں اکھنڈ بھارت کا نقشہ علاقائی تسلط پسندانہ عزائم کا ثبوت ہے۔
ان کا کہنا ہے کہ 22 اپریل سے آج تک پاکستان کو وہ ثبوت نہیں دیے گئے جو ہم مانگ رہے ہیں، پہلگام واقعے کے فوراً بعد بھارتی قیادت اور ذرائع ابلاغ نے طبل جنگ بجانا شروع کر دیا۔
رضوان سعید شیخ نے کہا کہ بارہا سمجھانے کے باوجود بھارت نے جارحیت کا مظاہرہ کیا اور خواتین و بچوں کو نشانہ بنایا، بھارت کا مسجدوں کو نشانہ بنائے جانے کا عمل حد درجہ اشتعال انگیز تھا۔
انہوں نے یہ بھی کہا کہ بھارتی جارحیت کے سامنے افواج اور عوام سیسہ پلائی دیوار کی طرح کھڑے ہو گئے، بھارتی قیادت ناصرف خود ناکام ہوئی بلکہ اس نے رافیل کو بھی فیل کروادیا۔
==========================
ترک کمپنی نے بھارتی حکومت کیخلاف عدالت سے رجوع کرلیا
نئی دہلی (نیوزڈیسک) بھارت میں ہوائی اڈوں پر گراؤنڈ ہینڈلنگ کی خدمات فراہم کرنے والی ترکیہ کی کمپنی نے بھارتی حکومت کی جانب سے سیکیورٹی کلیئرنس منسوخ کرنے کے فیصلے کو دہلی ہائی کورٹ میں چیلنج کر دیا ہے۔ ترک کمپنی سیلیبی ایئرپورٹ سروسز انڈیا نے گزشتہ روز دائر کی گئی درخواست میں موقف اختیار کیا ہے کہ اس فیصلے سے کمپنی کے 3ہزار 7سو21ملازمین کے روزگار متاثر اور سرمایہ کاروں کے اعتماد کو نقصان پہنچے گا۔تفصیلات کے مطابق نئی دہلی، کیرالہ، بینگلورو، حیدرآباد اور گوا کے ہوائی اڈوں پر گراؤنڈ ہینڈلنگ کی خدمات فراہم کرنے والی ترک کمپنی سیلیبی ایئرپورٹ سروسز انڈیا نے بھارتی حکومت کی جانب سے اس کی سیکورٹی کلیئرنس منسوخ کرنے کے فیصلے کے خلاف دہلی ہائی کورٹ سے رجوع کرلیا ہے ۔
=====================
موسمیاتی خطرات: اٹلی کا سندھ میں پسماندہ افراد کیلئے 4.4 ملین ڈالر کا منصوبہ
اسلام آباد( ساجد چوہدری، مہتاب حیدر ) اٹلی نے سندھ کے دیہی علاقوں میں موسمیاتی خطرات کا سامنا کرنے والے پسماندہ افراد کو بااختیار بنانے کیلئے 4.4 ملین ڈالر کی مالیت سے منصوبہ شروع کیا ہے جو تین سال میں مکمل ہو گا منصوبہ ارلی وارننگ سسٹم قائم کر کے ، پانی کے معیار کی نگرانی کو بہتر بنا کر سندھ میں دیہی برادریوں کی مدد کرے گا اس حوالے سے جمعہ کے روز مختلف تنظیموں کے ساتھ مفاہمت کی ایک یادداشت پر دستخط کئے گئے ، معاہدے پر دستخط کی تقریب اٹلی کے سفارت خانے اور اے آئی سی ایس کے نمائندوں کی موجودگی میں پاکستان میں اٹلی کی سفیر ماریلینا ارمیلن کی رہائش گاہ پر منعقد ہوئی، اطالوی ایجنسی فار ڈیولپمنٹ کوآپریشن کی طرف سے مالی اعانت فراہم کی گئی ہے ۔
