ذوالفقار چیمہ کی ذہنی طور پر فٹ اپنے102سالہ استاد سے ملاقات
لاہور(جنگ نیوز)سابق انسپکٹر جنرل موٹر وے ذوالفقار چیمہ نے گزشتہ روز اپنے استادِ شیخ امتیاز علی ( سابق پر نسپل یونیورسٹی لاء کالج) سے ان کی رہائش گاہ پر ملاقات کی ۔شیخ امتیاز علی کی عمر اسوقت 102 برس ہے مگر وہ ذہنی طور پر الرٹ ہیں اور انکی یاد داشت حیران کن ہے۔شیخ امتیاز علی اپنے شاگرد ذوالفقار چیمہ کو دیکھ کر بہت خوش ہوےاور بار بار کہتے رہے ذوالفقار مجھے تم پر فخر ہے ۔ اس موقع پر ذوالفقار چیمہ نے بتایا کہ شیخ امتیاز علی سے ہم نے قانون ہی نہیں زندگی کے اصول بھی سیکھے ہیں۔قانون کی حکمرانی ،اصولوں پر ڈٹ جانا میں نے والد کے بعد شیخ امتیاز علی سے سیکھا ۔شیخ صاحب کے پائے کا نہ ہی کوئی استاد دیکھا ہے اور نہ ہی کوئی منتظم۔انہوں نے بتایا کہ میں ہر عید پر استادِگرامی شیخ صاحب کو فون پر سلام کرتا ہوں اور خیریت دریافت کرتا ہوں۔اس بار عید پر سو گیا تو مجھے یوں لگاکہ مجھ سے کوئی جرم سر زد ہوگیا ہے لہذا میں نے تہیہ کر لیا کہ لاہور جا کر سلام کیلئے خود استادِ گرامی کی خدمت میں حاضر ہونگا۔
