کراچی ( اسٹاف رپورٹر ) سوشل پینشنرز کی عید ملن کی تقریب جلسہ کی شکل اختیار کرگئی۔ ایپو کے سینئیراور بزرگ ممبران نے تقریب میں شرکت کر کے موسم گرما کی شدید گرمی کو مات دے دی ۔ عید ملن تقریب سے خطاب کرتے ہوئے مہمان خصوصی پاکستان یونا ئیٹیڈ ورکرز فیڈریشن کے صدر مختار حسین اعوان نے ایپوا کے مطالبہ کی تائید کرتے ہوئے کہا کہ سوشل پینشنرز کی پینشن 11500 روپے انتہائی کم ہے اس میں اضافہ ناگزیر ہے انھوں نے کہا کہ صدر اور وزیر اعظم اس معاملے پر سنجیدگی اختیار کریں ۔محنت کشوں کے حقوق کے لیے ہماری جدوجہد جاری رہے گی۔ ایپوا کے چیئرمین اظفر شمیم نے کہا کہ ہم نے سوشل پینشنرز کے معاملے کو بار بار وفاقی سطح پر پیش کیا لیکن ہمارے پینشنرز کی رقم کو اصل حقدار یعنی سوشل پینشنرز کو دینے کےبجائےمختلف حیلے بہانے اختیار کیے جارہے ہیں انھوں نےمطالبہ کیا کہ ای او بی آئی کے مکمل فنڈ اعداد وشمار کے ساتھ پبلک کیاجائے۔ ایپوا کے صدر قاضی عبدالجبار نے زور دیا کہ حکومت نے ای او بی آئی کے فنڈ میں اپنا حصہ یعنی میچنگ الاونس 1995 سے دینا بند کیا ہوا ہے اسےفوری طور پر بحال کیا جائے ۔ جنرل سیکریٹری علمدار رضا نے ایپوا کی کارکردگی بتاتے ہوئے کہا کہ ہم نے ریوائز پینشن پربہت کام کیا ہے اس میں ہمیں کامیابی بھی ملی ہے لیکن ابھی بہت سے مسائل حل طلب ہیں۔ نائب صدر شمس الضحی زبیری’ کور کمیٹی کےرکن ظفر پاشا; خواتین کی صدر ملکہ افروز روھیلہ ؛نوشابہ ہاشمی؛ نے پینشنرز کے مسائل پر روشنی ڈالی اور ان کے حل کے لیے کوششیں تیز کرنے پر زور دیا۔ سیکریٹری نشرواشاعت رضا حیدر نےسوشل پینشنرز کے مسائل پر ان کےحل کے لیے مطالبات ہر قرارداد پیش کی جسے ایوان نے متفقہ طور پر منظور کرلیا۔ این ایل ایف پاکستان کے سینئیر نائب صدر ظفر خان؛ پاکستان ٹیلی وژن کے مشتاق میرانی ؛ سینئیر مزدور رہنما زاہد عسکری؛ سلیم یوسف اور الفلاح بنک کے مینیجر شجاع الرحمان نے ایپوا کے ریٹائرڈ ملازمین سے اظہار یکجہتی کرتے ہوئے کہا کہ محنت کش اس ملک کی معیشت کا اہم جز ہیں انکی سہولیات کا خیال رکھنا حکومت کی ذمہ داری ہے۔ کوٹری سے ایپوا کے رہنما عزیز بھٹی نے تقریب میں شرکت کر کے ایپوا رہنماوں کو اجرک اور ٹوپی کے تحائف پیش کیے۔ ایپوا کی جانب سے سینئیر نائب صدر متین خان نے کوٹری کے دوستوں کو تحائف دیے اس موقع پر رہنماوں نے کیک بھی کاٹا ۔صدر قاضی عبدالجبار نے مہمانوں کا شکریہ ادا کیا جبکہ نیشنل ریفائنری کے نسیم احمد نے دعا خیر کی۔ نظامت کے فرائض شاہد غزالی اور حسین احمد زیدی نے انجام دیے۔ تقریب کے بہترین۔انتظامات پر متین خان ؛اخلاق احمد اور انکی ٹیم کو خراج تحسین پیش کیا گیا۔
