کراچی / وزیراعلیٰ ہاؤس / 4 مئی 2025ء
وزیراعلیٰ سندھ سید مراد علی شاہ کی ہدایت پر ٹریفک قوانین کی خلاف ورزی کے خلاف سخت کارروائی جاری ہے۔ ٹریفک پولیس کی جانب سے 16 اپریل سے 4 مئی تک کی کارروائی کی تفصیلی رپورٹ وزیراعلیٰ کو پیش کی گئی، جس کے مطابق:
31,677 موٹرسائیکلیں ہیلمٹ نہ پہننے اور دیگر ٹریفک قوانین کی خلاف ورزی پر ضبط کی گئیں۔
2,719 گاڑیوں کے خلاف فینسی نمبر پلیٹس اور کالے شیشوں پر کارروائی کی گئی۔
515 ایچ ٹی وی / ایل ٹی وی لائسنس ضبط کیے گئے، جبکہ 25 لائسنس منسوخ اور 491 عارضی طور پر معطل کردیے گئے۔
104 گاڑیوں کے مالکان کے خلاف غفلت اور قانون کی خلاف ورزی پر قانونی چارہ جوئی کی گئی۔
1 ایف آئی آر اوور اسپیڈنگ، جبکہ 33 ایف آئی آر غلط سمت میں ڈرائیونگ پر درج کی گئیں۔
311 گاڑیاں کورٹ کی تحویل میں دی گئیں اور 311 ڈرائیورز کو گرفتار کیا گیا۔
23 بغیر رجسٹریشن کی گاڑیاں اور 32 غیر معیاری ایل پی جی / سی این جی کٹیں ضبط کی گئیں۔
7,069 افراد پر ٹریفک قوانین کی خلاف ورزی پر جرمانے عائد کیے گئے۔
وزیراعلیٰ سندھ نے واضح ہدایت دی ہے کہ ٹریفک قوانین کی خلاف ورزی پر کسی قسم کی رعایت نہ دی جائے۔ انہوں نے عوام سے اپیل کرتے ہوئے کہا:
“ٹریفک قوانین کی پابندی ہی آپ کی جان کا تحفظ ہے۔ ہیلمٹ کا استعمال یقینی بنائیں، فینسی نمبر پلیٹس اور کالے شیشوں سے گریز کریں، ورنہ سخت قانونی کارروائی ہوگی۔ ہیوی ٹریفک کی رفتار 30 کلومیٹر فی گھنٹہ سے زیادہ نہ ہو۔ نابالغ ڈرائیورز کو روکیں اور لائسنس کے بغیر گاڑی چلانے والوں کے خلاف فوری ایکشن لیں۔”
انہوں نے ٹریفک پولیس کو ہدایت دی کہ سگنلز کی خلاف ورزی، پریشر ہارن کے غیر قانونی استعمال، اور پیدل چلنے والوں کے لیے زیبرا کراسنگ پر خصوصی توجہ دی جائے۔ عوامی آگاہی مہم کے ذریعے شہریوں میں ٹریفک قوانین کا شعور بڑھانے پر بھی زور دیا گیا۔
عبدالرشید چنا
میڈیا کنسلٹنٹ، وزیراعلیٰ سندھ
