تحریر: رافیہ جاوید ملاح
دنیا ایک بار پھر بھارت کی انتہا پسند حکومت کی جانب سے پیدا کی گئی اشتعال انگیزی اور پاکستان کو عالمی سطح پر بدنام کرنے کی ناکام کوششوں کی گواہ بن رہی ہے۔ حالیہ دنوں میں بھارت نے یکطرفہ طور پر سندھ طاس معاہدے کی خلاف ورزی کرتے ہوئے آبی جارحیت کا ارتکاب کیا، جو نہ صرف بین الاقوامی معاہدوں کی صریح خلاف ورزی ہے بلکہ جنوبی ایشیا کے امن و استحکام کے لیے خطرے کی گھنٹی بھی ہے۔
فاشسٹ مودی حکومت ایک مرتبہ پھر خود ساختہ پلوامہ جیسے واقعے کو بنیاد بنا کر پاکستان پر الزام تراشی کی روش اختیار کر رہی ہے۔ یہ وہی پرانا گھسا پٹا بیانیہ ہے جس کا مقصد محض پاکستان کو بدنام کرنا اور عالمی برادری کی توجہ اپنی اندرونی ناکامیوں سے ہٹانا ہے۔ لیکن بھارت کی یہ چالیں اب دنیا پر عیاں ہو چکی ہیں۔ بی جے پی اور آر ایس ایس جیسی انتہا پسند تنظیموں کا کردار دنیا کے سامنے کسی سے ڈھکا چھپا نہیں رہا۔
پاکستان ایک ذمہ دار ریاست ہے جو نہ صرف اپنے ہمسایوں کے ساتھ پرامن بقائے باہمی پر یقین رکھتی ہے بلکہ داخلی طور پر بھی ایک مضبوط، خودمختار اور ترقی پذیر ملک کے طور پر ابھر رہا ہے۔ یہاں تمام قومیتوں کو مساوی حقوق حاصل ہیں، اقلیتوں کے تحفظ کو آئینی و عملی سطح پر یقینی بنایا گیا ہے، اور پاکستان کی مسلح افواج ملکی سالمیت کی ضامن ہیں۔ ہمیں اپنی بہادر افواج پر فخر ہے جنہوں نے ہر محاذ پر ملک کا وقار بلند رکھا ہے۔
مودی حکومت چاہے جتنی بھی کوشش کر لے، پاکستان کے خلاف کچھ بھی کرنے میں ناکام رہے گی، انشاءاللہ۔ ہم بحیثیت قوم ہر سازش کو ناکام بنانے کے لیے پرعزم ہیں۔ اگر وقت آیا، تو پاکستان کا ہر بچہ افواجِ پاکستان کے شانہ بشانہ کھڑا ہوگا اور وطن عزیز کے ایک ایک انچ کا دفاع کرے گا۔
پاکستان اللہ کے نام پر قائم ہوا ہے اور انشاءاللہ تاقیامت قائم رہے گا۔ ہمیں اپنے وطن، اس کی سالمیت، خودمختاری اور افواج پر مکمل اعتماد ہے۔ دشمن کو یہ جان لینا چاہیے کہ پاکستان امن کا علمبردار ضرور ہے، لیکن اپنی خودداری پر کسی قسم کا سمجھوتہ نہیں کرے گا۔
