سندھ ہائیکورٹ نے ائیر پورٹ قریب خود کش حملے کے کیس کی ملزمہ کی درخواست ضمانت پر ملتوی کردی، عدالت عالیہ نے ریمارکس دیئے کہ جے آئی ٹی رپورٹ فراہم کرنے کیلیے اس مرحلے پر حتمی چالان آنے تک ہدایت جاری نہیں کرسکتے۔ ہائیکورٹ میں ائیر پورٹ قریب خود کش حملے کے کیس کی ملزمہ کی درخواست ضمانت کی سماعت ہوئی۔ ملزمہ گل نساء کی جانب سے شوکت حیات ایڈووکیٹ عدالت میں پیش ہوئے۔ وکیل صفائی نے موقف دیا کہ ملزمہ کی گرفتاری کو 6 ماہ ہوگیے ہیں تاحال پولیس نے کیس کا حتمی چالان جمع نہیں کرایا۔ پولیس کی جانب سے جمع کروائے گئے عبوری چالان کو حتمی سمجھا جائے۔ کیس کی تحقیقات کیلئے جے آئی ٹی بنائی گئی تھی اسکی رپورٹ کی نقول فراہم کی جائیں۔ ملزمہ پر لگائے گئے سہولتکاری، کالعدم تنظیم سے روابط کے دستاویزات فراہم کیئے جائیں۔ پراسکیوشن کی جانب سے کیس میں تاخیری حربے استعمال کیے جارہے ہیں۔ تفتیشی افسر نے کہا کہ حتمی چالان پیش کرنے میں فارنسک پراسیس کی وجہ سے تاخیر ہورہی ہے۔ 3 یو ایس بیز لاہور فارنسک معائنے کیلیے بھیجی ہیں، وہ سیل ہیں۔ رپورٹس مل گئی ہیں جن کے مطابق ریکارڈ میں مواد موجود ہے۔ مواد کی جانچ پڑتال کیلیے یو ایس بیز کی ضرورت ہے، اسلیے ڈی سیل کرنے کی درخواست کی ہے۔ جسٹس ظفر احمد راجپوت نے ریمارکس دیئے کہ جے آئی ٹی رپورٹ فراہم کرنے کیلیے اس مرحلے پر حتمی چالان آنے تک ہدایت جاری نہیں کرسکتے۔ تفتیشی افسر نے کہا کہ ہمیں مواد کی جانچ پڑتال کیلیے مذید مہلت دیجائے۔ عدالت نے سماعت 16 مئی تک ملتوی کردی۔ پولیس کے مطابق اکتوبر 2024 میں کراچی ائیر پورٹ کے قریب چینی باشندوں پر خود کش حملہ کیا گیا تھا۔ حملے میں دو غیر ملکی ہلاک ہوگئے تھے۔ کیس میں ملزمہ گل نساء اور جاوید گرفتار ہیں۔ ملزمان پر خود کش حملے میں سہولتکاری کا الزام ہے۔
=================
سندھ بار کونسل کے قائمقام سیکریٹری ایم رستم بھٹو کے مطابق مشترکہ مفادات کونسل (سی سی آئی) کے 52 ویں اجلاس میں ہونے والے فیصلے کی روشنی میں سندھ بار کونسل کے وائس چیئرمین اور چیئرمین ایگزیکٹو کمیٹی نے صوبہ سندھ بھر میں عدالتی کارروائیوں کی ہڑتال کو باضابطہ طور پر ختم کرنے کا اعلان کیا ہے۔ وکلا کو مطلع کیا جاتا ہے کہ عدالتی کارروائی آج 30 اپریل 2025 سے معمول کے مطابق دوبارہ شروع ہوگی۔
===================
اسپیشل جج بینکنگ عدالت نے منی لانڈرنگ کے مقدمے کی سماعت ملتوی کردی۔ کراچی میں اسپیشل جج بینکنگ عدالت کے روبرو منی لانڈرنگ کی مقدمے کی سماعت ہوئی۔ حسین لوائی اور دیگر ملزم عدالت میں پیش ہوئے۔ اومنی گروپ کے اونر انور مجید نے بریت کی درخواست دائر کردی۔ درخواست میں موقف اپنایا گیا کہ فریال تالپورسمیت 20 ملزمان کے نام مقدمے سے خارج ہوچکے ہیں۔ میرے خلاف کوئی ثبوت نہیں ہے۔مقدمہ ختم کرکے مجھے بری کیا جائے۔ مقدمے میں ملوث صدر پاکستان آصف علی زرداری کی مستقل استثناء کی درخواست سماعت نہ ہوسکی۔عدالت نے مقدمے کی سماعت 13 مئی تک ملتوی کردی۔ صدر آصف علی زرداری، انورمجید، حسین لوائی اور دیگر پر کروڑوں روپے کی غیر قانونی منتقلی کا الزام ہے۔
