جعفرآباد۔ محمد زیب بلوچ
ایس ایس پی جعفرآباد کامران نواز نے کہا ہے کہ عوام کی جان و مال کی حفاظت ۔ امن و امان اور جرائم کا مکمل خاتمہ سمیت پولیس اور عوام کے درمیان دوستانہ ماحول کی فراہمی اولین ترجیحات کا حصہ ہیں ۔انہوں نے کہا کہ کسی کو بھی قانون ہاتھ میں لینے کی اجازت نہیں دی جائے گی۔ آئس اور دیگر منشیات کا استعمال نوجوان نسل کیلئے زہر قاتل ہے۔ اس کے تدارک کیلئے تمام وسائل بروئے کار لائے جائیں گے۔ ان خیالات کا اظہار انہوں نے اپنے عہدے کا چارج لینے کے بعد ڈسٹرکٹ پریس کلب کے صحافیوں سے ملاقات کے دوران کیا۔ ان کا کہنا تھا کہ بلوچستان سے ملحقہ سندھ کے سرحدی پٹی پر پولیس کی چیکنگ کو مزید موثر بنایا جائے گا شہر اور گردونواح میں موٹر سائیکل چھیننے اور چوری کے واردات کی روک تھام کیلئے سنجیدہ کوششیں کی
جائیں گی اور پولیس گشت کو فعال بنایا جائے گا تھانوں میں مظلوموں کی داد رسی کو اولیت دی جائے گی صاف اور جلد انصاف کی فراہمی کو ہر صورت یقینی بنانے کیلئے ضلع پولیس کو مزید اقدامات کرنے کی ضرورت ہے جرائم کے واقعات رونما ہونے کی صورت میں پولیس کی پہلی ترجیح کیس کو ٹریس آؤٹ کر کے ملزمان کی گرفتاری ہو گی انہوں نے امید ظاہر کی کہ صحافی اور سول سوسائٹی کے نمائندوں اور شہریوں کے ساتھ بہتر تعلقات استوار کر کے جرائم کے مکمل خاتمےکے لیے معاشرے کے ہر فرد کو اپنا کردار ادا کرنا ہوگا۔ جس سے پر امن جعفرآباد کا خواب شرمندہ تعبیر ہو گا۔
