
علما ء کرام کا رمضان کی اہمیت اور فضیلت کے حوالے سے خطاب
رمضان المبارک میں عوام کو بہترین سہولتیں اور خدمات فراہم کریں گے: فراز حسیب
مورخہ:21فروری،2025ء
کراچی( )ٹاؤن میونسپل کارپوریشن لیاقت آباد کے زیر اہتمام پردہ پارک میں استقبال رمضان کے حوالے سے روحانی محفل کا انعقاد۔محفل میں وائس چیئرمین اسحاق تیموری، منتخب بلدیاتی نمائندوں اور ٹاؤن کے افسران و ملازمین نے شرکت کی۔اس موقع پر علما ء کرام نے روزے کی اہمیت اور رمضان کی فضیلت کے حوالے سے بیان کر تے ہوئے کہا کہ رمضان کا مہینہ،رحمت،برکت اور قربت الہیٰ پانے کا مہینہ ہے اللہ تعالیٰ نے فرمایا کہ اے ایمان والو ں تم پر روزے فرض کئے گئے جیسے کہ تم سے پہلے کی قوموں پر فرض کئے گئے۔انہوں نے مزید کہا کہ صوم کے معنی روکنے اور ٹھہر نے کے ہیں یعنی رمضان میں مسلمانوں کو برائی کے عمل سے رکنے کی ہدایت کی گئی ہے۔اس موقع پر چیئر مین لیا قت آ با د ٹاؤن فراز حسیب نے کہا کہ رمضان رحمتوں اور برکتوں کا مہینہ ہے ہمیں چاہیے کہ اس مہینے میں زیادہ سے زیادہ عبادات کریں اور حقوق العباد کا خیال کرتے ہوئے اپنے رب کو راضی کریں۔وائس چیئر مین اسحاق تیموری نے کہا کہ روزہ جسم کی زکوٰۃ ہے۔ ہمیں چاہیے کہ اس ماہ مبارک میں عبادات کے ساتھ ساتھ اپنے غریب ضرورت مند بھائی بہنوں کا بھرپور خیال رکھیں اور ہر قسم کے برے اعمال سے مکمل اجتناب کریں۔ اور اپنی ذمہ داریوں کو ایمانداری سے سر انجام د یں۔چیئرمین فراز حسیب نے انتظامی امور کے حوالے سے گفتگو کرتے ہوئے کہا کہ رمضان المبارک سے قبل ہماری پوری کوشش ہے کہ تجاوزات کا خاتمہ کیا جائے اور مارکیٹوں کے اطراف قائم پتھاروں جو کہ ٹریفک کی روانی میں خلل ڈال رہے ہیں ان کا خاتمہ کیا جائے۔ ٹاؤن انتظامیہ کی جانب سے مارکیٹوں کے اطراف عوام کی سہولت کے لئے کیمپ قائم کئے جائیں گے جہاں عوام رہنمائی حاصل کرنے کے ساتھ گراں فروشی، اور دیگر تکالیف کی شکایت درج کرا سکتے ہیں، رمضان المبارک میں ریسکیو کا عملہ ٹریفک کو رواں دواں رکھنے کے لئے فیلڈ میں موجود رہے گا۔
فہیم مصطفی
ڈائریکٹر انفارمیشن
لیاقت آباد ٹاون























