یو ایم ٹی اور حکومتِ پنجاب کے مابین تاریخی مفاہمتی یادداشت (ایم او یو) پر دستخط
لاہور 20 فروری :: یونیورسٹی آف مینجمنٹ اینڈ ٹیکنالوجی (یو ایم ٹی) اور حکومتِ پنجاب کے درمیان ایک تاریخی مفاہمتی یادداشت (ایم او یو) پر دستخط کیے گئے۔ تقریب میں صوبائی وزیر برائے اقلیتی مذہبی امور، رمیش سنگھ اروڑہ نے بطور مہمانِ خصوصی شرکت کی۔ ان کے ہمراہ پارلیمانی سیکرٹری سونیا عاشر، دیگر سکھ رہنما اور پاکستان گوردوارہ پر بندھک کمیٹی کے ممبران بھی موجود تھے۔
ڈی جی یو ایم ٹی نے صوبائی وزیر کو یونیورسٹی کے تعلیمی اقدامات کے حوالے سے بریفنگ دیتے ہوئے بتایا کہ یو ایم ٹی میں 100 سے زائد مذہبی اقلیتی طلباء زیر تعلیم ہیں، جبکہ 35 طلب علم مختلف اسکالرشپس پر اعلیٰ تعلیم حاصل کر رہے ہیں۔ احمد عبداللہ نے مزید کہا کہ اب تک یو ایم ٹی سے 121 مذہبی اقلیتی طلباء تعلیم مکمل کر چکے ہیں اور یونیورسٹی 37 ملین روپے سے زائد کی اسکالرشپس ان طلباء کو دے چکی ہے۔
ایم او یو کے تحت “شری گرو نانک اسکالرشپس” میں ہر سال 10 سکھ طلبہ کو مکمل فنڈڈ اسکالرشپ دی جائیں گی، جس کی مجموعی مالیت 2 کروڑ روپے سالانہ ہوگی۔
صوبائی وزیر رمیش سنگھ اروڑہ نے اس موقع پر وزیرِ اعلیٰ پنجاب، محترمہ مریم نواز کی تعلیمی پالیسیوں کا حوالہ دیتے ہوئے کہا کہ پنجاب حکومت تمام طبقات کے طلبہ کے لیے یکساں تعلیمی مواقع پیدا کرنے کے لیے پُرعزم ہے۔ انہوں نے یو ایم ٹی انتظامیہ کو شری گرو نانک اسکالرشپ پروگرام کے آغاز پر مبارکباد دی اور کہا کہ یہ پروگرام حکومتِ پنجاب کے تعلیمی وژن اور مذہبی اقلیتی کمیونٹیز کی حمایت کے عزم کی عکاسی کرتا ہے۔
صوبائی وزیر نے اس موقع پر اقلیتی طلبہ سے ملاقات بھی کی اور ان کے تعلیمی سفر کا جائزہ لیا۔
تقریب میں ڈائریکٹر جنرل یو ایم ٹی احمد عبداللہ، رجسٹرار ناصر خان، ڈینز، فیکلٹی ممبران اور طلباء کی بڑی تعداد نے شرکت کی۔
