کراچی( )پاکستان مرکزی مسلم لیگ سندھ کے صدر فیصل ندیم نے کہا ہے کہ کراچی کے شہریوں کا خون سستا نہیں ہے۔ حکمران شہریوں کے کچلے جانے پر کچھ نہیں کرسکتے تو حکومت چھوڑ دیں۔ ٹریفک قوانین پر عمل درآمد نہ ہونے سے آئے روز حادثات ہو رہے ہیں۔ مرکزی مسلم لیگ نے ٹریفک حادثات کی روک تھام کے لیے آگاہی مہم شروع کر دی ۔ شہریوں میں فری ہیلمٹ اور سائڈ مرر تقسیم کیے ۔ تاکہ انسانی جانوں کو ضائع ہونے سے بچایا جاسکے ۔ ان خیالات کا اظہار انہوں نے میلینیم مال چورنگی پر موٹر سائیکل سواروں میں فری ہیلمیٹ اور سائڈ ویو مرر کی تقسیم کے موقع پر خطاب کرتے ہوئے کیا۔ تقریب میں مرکزی مسلم لیگ کراچی کے صدر احمد ندیم اعوان، نائب صدور شہباز عبدالجبار، مہدی اسحاق، بلال حیدر، محبوب علی و دیگر رہنما بھی موجود تھے۔
فیصل ندیم نے خطاب کرتے ہوئے کہا کہ پاکستان کو سب سے زیادہ ریوینیو دینے والے شہر کی حالت ہمارے سامنے ہے۔ اس شہر کی سڑکوں پر لوگ کچلے جا رہے ہیں۔ لگتا ہے کہ شہر قائد کے عوام کے قتل کی اجازت دے دی گئی ہے۔ انہوں نے کہا کہ حکمرانوں پر عوام کے کچلے جانے سے کوئی فرق نہیں پڑتا۔ اسی ملینیم مال کے سامنے شہریوں کو کچلا گیا۔ بڑی تعداد میں شہریوں کے کچلے جانے کے باوجود شہریوں کے لیے کچھ نہیں کیا جا رہا۔ فیصل ندیم نے کہا کہ اس شہر کی سڑکوں کی حالت اور انفراسٹرکچر قابل رحم ہے۔
ڈمپر گردی کے ذریعے لوگوں کو کچلے جانے کے باوجود حکومت خاموش ہے۔ اگر حکمران شہریوں کے لیے کچھ نہیں کرسکتے تو حکومت چھوڑ دیں۔ انہوں نے کہا کہ فارم 47 کی حکومت اور اسمبلی اراکین ایوان میں بیٹھ کر کیا کر رہے ہیں۔ ہیوی ٹرانسپورٹ کے لیے قوانین پر عمل درآمد نہیں کیا جا رہا۔ بغیر لائسنس گاڑی چلانے والے کے خلاف حادثے کی صورت میں قتل کا مقدمہ درج کیا جائے۔ انہوں نے کہا کہ کراچی کے شہریوں کا خون سستا نہیں ہے۔ شہریوں کی بھی ذمہ داری بنتی ہے کہ وہ ٹریفک قوانین کی پاسداری کریں۔ موٹر سائیکل سوار اپنی ذمہ داری پوری کریں۔ ہم ٹریفک حادثات کی روک تھام کے لیے آگاہی مہم شروع کرنے جا رہے ہیں۔ موٹر سائیکل سوار ہیلمیٹ اور سائڈ میرر کا لازمی استعمال کریں۔ مرکزی مسلم لیگ کے دفاتر سے ہیلمیٹ رعایتی قیمت پر دستیاب ہوگا۔
جاری کردہ:
شعبہ نشر و اشاعت، پاکستان مرکزی مسلم لیگ کراچی
