پاکستانی اداکارہ ہانیہ عامر کے ڈیلس میٹ اینڈ گریٹ میں آرگنائیزر کی بدتمیزی کے حوالے سے معلوم ہونے پر شوبز ستارے میدان میں آگئے۔
ہانیہ عامر اور فہد مصطفیٰ ان دنوں امریکہ میں موجود ہیں جہاں وہ اپنے امریکہ میں مقیم فینز کیلئے میٹ اینڈ گریٹ منعقد کرتے نظر آئے۔
ڈیلس میں منعقدہ میٹ اینڈ گریٹ شہ سرخیوں میں زیادہ جگہ بناتی نظر آرہی ہے اور اسکی وجہ ایونٹ کے شروع ہونے کے کچھ دیر بعد ہانیہ عامر اور فہد مصطفیٰ کا وہاں سے غائب ہوجانا ہے۔
میڈیا رپورٹس کے مطابق ڈیلس میں منعقدہ میٹ اینڈ گریٹ شروع ہونے کے صرف 35 منٹ کے بعد ہی ہانیہ عامر اپنے ہوٹل واپس لوٹ گئی تھیں اور ان کے ساتھ فہد مصطفیٰ بھی ایونٹ چھوڑ کر چلے گئے۔
اسٹیج خالی ہوجانے پر وہاں موجود فینز ہانیہ عامر اور فہد مصطفیٰ کے پروفیشنلزم پر سوال اٹھاتے دکھے لیکن اس کی وجہ سے سب انجان تھے جسکا خلاصہ ہانیہ عامر نے انسٹاگرام اسٹوری سے کیا۔
ہانیہ عامر نے فوٹو اینڈ ویڈیو شیئرنگ ایپ انسٹاگرام پر اسٹوری شیئر کی جس میں انہوں نے بتایا کہ ‘ایونٹ میں سب ٹھیک تھا، وہ فینز کے ساتھ تصاویر بنواکر واپس سیٹ پر آئیں تو انہیں دکھا کہ انکی منیجر سے مرد آرگنائیزر بد تمیزی سے بات کر رہے تھے جس پر ہانیہ نے ایسا کرنے سے روکا، بیک اسٹیج فینز کے ساتھ تصاویر بنواتے ہوئے وہ ہی شخص آگیا اور اس نے بدتمیزی کی اور وہاں سے نکلنے کو کہا جس کے بعد وہ ہوٹل واپس لوٹ گئیں’۔
ہانیہ عامر نے اپنے طویل نوٹ میں خاتون منیجر سے کی جانے والی بدتمیزی پر سخت ردِ عمل دیا اور کہا کہ وہ ایسا رویہ برداشت نہیں کرسکتیں۔
ہانیہ عامر کی جانب سے کیے جانے والے انکشاف کے بعد شوبز ستارے بھی ہانیہ عامر کی حمایت کرنے میدان میں اتر آئے ہیں اور اداکارہ کی اسٹوریز شیئر کر کے اپنی بھرپور حمایت کا اظہار کرتے دکھ رہے ہیں۔
ہانیہ عامر کے حق میں آواز بلند کرنے والوں میں اداکارہ حرا خان، یشما گِل، انوشے اشرف، مایا علی، اداکار اذان سمیع خان، ڈیجیٹل کانٹینٹ کریئٹر یوخانو اور کاشف آفریدی شامل ہیں۔
حرا خان نے اسٹوری ری شیئر کرتے ہوئے لکھا کہ ‘نہیں آپ سب کچھ آرٹسٹ پر نہیں ڈال سکتے کہ یہ سب سے زیادہ آسان ہے’۔
یوخانو نے لکھا کہ ‘نہیں ہم اپنے پاکستانی فنکاروں کے ساتھ ہیں، ہم پاکستانی آرٹسٹس کی بے عزتی ہوتے نہیں دیکھ سکتے’۔
انوشے اشرف نے لکھا کہ ‘بے عزتی اور بدتمیزی کسی حالات قبول نہیں ہے، آرٹسٹ ہمارا قیمتی اثاثہ ہیں، مجھے افسوس ہے کہ ہانیہ عامر کو اس سب کا سامنا کرنا پڑا، لوگ خواتین سے بدتمیزی کر کے اپنی تربیت ظاہر کرتے ہیں، وہ جو کوئی بھی شخص ہے اسے آج کے بعد کسی ایونٹ کو آرگنائز کرنے کی اجازت نہیں ملنی چاہئے اگر وہ اس معاملے کو باعزت طریقے سے ہینڈل نہیں کرتا’۔
مایا علی نے بھی ہانیہ عامر کی اسٹوری ری شیئر کی اور لکھا کہ ‘بے عزتی کسی حال قبول نہیں، مجھے ہانیہ عامر اور مائدہ عظمت پر بہت فخر ہے کہ انہوں نے اس سب کو اتنے اچھے سے ہینڈل کیا، بہت افسوس کی بات ہے کہ کچھ لوگ ہمارے پاکستانی اسٹارز کو عزت نہیں دے پاتے’۔
واضح رہے کہ ہانیہ عامر نے اپنی اسٹوری میں جس خاتون منیجر کا ذکر کیا وہ مائدہ عظمت ہیں جبکہ یہ ایونٹ سامیہ عادل نے منعقد کروایا تھا اور انہوں نے بھی ہانیہ عامر کے ہی موقف کی حمایت کرتے ہوئے خاتون کے ساتھ بدتمیزی کی مخالفت کی۔
