
کراچی: کراچی کی مختلف جامعات اور مدارس کے 400 سے زائد طلبہ و طالبات نے پاکستان رینجرز (سندھ) کے ٹریننگ سینٹر اور اسکول کا دورہ کیا۔ اس موقع پر شرکاء کو رینجرز کی بنیادی ذمہ داریوں اور پیشہ وارانہ صلاحیتوں سے آگاہ کیا گیا۔
معلوماتی دورے کے دوران رینجرز کے سپیشل دستوں نے دہشت گردی کے خلاف نبرد آزما ہونے کے لیے مختلف مشقوں اور ڈرلز کا مظاہرہ کیا۔ بعد ازاں طلبہ و طالبات نے رینجرز شوٹنگ اور سیڈل سینٹر کا بھی دورہ کیا، جہاں بارڈر پر ہونے والی اونٹ بردار پٹرولنگ اور فائرنگ کے مظاہرے دکھائے گئے۔
خصوصی نشست میں شرکاء نے سیکورٹی کے حوالے سے ڈی جی رینجرز (سندھ) سے مختلف سوالات کیے۔ طلبہ و طالبات نے کراچی میں امن و امان کے قیام میں سندھ رینجرز کے کردار کو سراہا اور منعقد کی گئی سرگرمیوں کے لیے شکریہ ادا کیا۔























