13 نومبر ، 2025
کراچی (اسٹاف رپورٹر ) منعم ظفر خان نے ادارہ نور حق میں امراء اضلاع اور دیگر ذمہ داران کے ایک اجلاس میں امیر جماعت اسلامی کراچی کی حیثیت سے نئے سیشن نومبر2025تا اکتوبر 2028تک کے لیے اپنی ذمہ داری کا حلف اُٹھا لیا، اجلاس میں امیر جماعت اسلامی سندھ کاشف سعید شیخ نے بھی شرکت کی اور منعم ظفر کے لیے استقامت و کامیابی کی دعا کی،اجلاس میں اجتماع عام 21تا23نومبر مینار پاکستان لاہور کے حوالے سے تیاریوں اور انتظامات کا جائزہ لیا گیا اور اس امر پر زور دیا گیا کہ اجتماع میں کراچی سے زیادہ سے زیادہ تعداد میں افراد کی شرکت کو یقینی بنایا جائے اور اس کے لیے مختلف طبقات اور مختلف شعبہ ہائے زندگی سے وابستہ افراد سے بھر پور رابطے کیے جائیں، منعم ظفر خان نے اجتماع عام کے حوالے سے گفتگو کرتے ہوئے کہا کہ شہر بھر میں بینرز، سائن بورڈز اور دیگر ذرائع سے عوامی آگہی اور دعوت دینے کا سلسلہ تیزی سے جاری ہے۔ شہر بھر میں تحرک پیدا کرنے کے لیے 14 اور 15 نومبر کو مختلف اضلاع میں کیمپس لگائے جائیں گے، ہینڈ بلز تقسیم کیے جائیں گے۔ اضلاع کی سطح پر فلوٹ مختلف علاقوں میں گشت کریں گے،کارنر میٹنگز کا بھی اہتمام کیا جائے گا۔
