دھماکے کے بعد علاقے میں خوف و ہراس پھیل گیا، پولیس کی بھاری نفری موقع پر پہنچ گئی اور علاقے کو گھیرے میں لے لیا
سوات میں گاڑی کے قریب بم دھماکہ، اے این پی کے رہنماء بال بال بچ گئے
سوات 12 نومبر2025ء) صوبہ خیبرپختونخواہ کے علاقہ سوات میں مٹہ شکردرہ میں سڑک کنارے بم دھماکہ ہوا، جس میں عوامی نیشنل پارٹی کے رہنماء بال بال بچ گئے۔ میڈیا رپورٹس کے مطابق پولیس نے بتایا کہ دھماکہ شکردرہ کے علاقے میں اس وقت ہوا جب عوامی نیشنل پارٹی کے رہنما ممتاز علی خان اپنی گاڑی میں جنازے میں شرکت کے لیے روانہ ہوئے، وہ گھر سے نکلنے کے بعد ابھی تقریباً تین سو فٹ دور ہی گئے تھے کہ اس دوران سڑک کنارے نصب بم اچانک پھٹ گیا، جس سے گاڑی کو شدید نقصان پہنچا، تاہم ممتاز علی خان اور ان کے ساتھی محفوظ رہے۔
بتایا گیا ہے کہ دھماکے کے بعد علاقے میں خوف و ہراس پھیل گیا، پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیئے، بم ڈسپوزل اسکواڈ کو بھی طلب کر لیا گیا تاکہ مزید ممکنہ خطرات کا جائزہ لیا جا سکے، ابتدائی شواہد کا جائزہ لینے کے بعد پولیس نے دھماکہ ریموٹ کنٹرول بم کے ذریعے کیے جانے کا شبہ ظاہر کیا تاہم واقعے کی مزید تحقیقات شروع کردی گئیں۔
اے این پی سوات کے سینئر نائب صدر ممتاز علی خان کی گاڑی پر دھماکے کی عوامی نیشنل پارٹی کے مرکزی صدر ایمل ولی خان نے مذمت کی، انہوں نے کہا کہ اے این پی سوات کے سینئر نائب صدر ممتاز علی خان کی گاڑی پردھماکہ بزدلانہ اور قابل مذمت فعل ہے، سوات کے عوام نے دہشت گردی اور انتہا پسندی کے خلاف بے پناہ قربانیاں دی ہیں، ہم نے جانوں کے نذرانے دے کر اپنی حکومت میں سوات اور پورے مالاکنڈ ڈویژن کو دہشت گردوں سے پاک کیا تھا مگر بدقسمتی سے آج سوات سمیت دیگر اضلاع کے عوام ایک بار پھر خوف و دہشت کے سائے میں زندگی گزارنے پر مجبور ہیں۔
ایمل ولی خان کا کہنا ہے کہ ممتاز علی خان اور ان کا خاندان دہشت گردی کے خلاف جدوجہد میں پہلے ہی ناقابلِ تلافی جانی نقصان برداشت کر چکا ہے، حالیہ واقعہ واضح کرتا ہے کہ دہشت گرد ایک منظم منصوبہ بندی کے تحت ان آوازوں کو خاموش کرنے کی کوشش کر رہے ہیں جو امن، برداشت اور جمہوریت کی بات کرتے ہیں، اس طرح کے بزدلانہ ہتھکنڈوں سے ہمارے عزم کو کمزور نہیں کیا جا سکتا، اے این پی کا مؤقف روزِ اول سے واضح ہے کہ دہشت گرد کسی مسلک، قوم یا گروہ کے نہیں بلکہ پوری انسانیت کے دشمن ہیں، عوامی نیشنل پارٹی ممتاز علی خان اور ان کے خاندان کے ساتھ کھڑی ہے، دہشت گردی کے خلاف اور قیامِ امن کے لیے اپنی جدوجہد ہر حال میں جاری رکھیں گے، حکومت اور قانون نافذ کرنے والے ادارے اس واقعے کی جامع تحقیقات کرائیں اور ذمہ دار عناصر کے خلاف سخت کارروائی عمل میں لائی جائے۔
