کراچی(اسٹاف رپورٹر)کراچی واٹر اینڈ سیوریج کارپوریشن نے شہر میں فراہمی و نکاسی آب کے نظام کو جدید تقاضوں سے ہم آہنگ کرنے، عوامی سہولت میں اضافہ کرنے اور انتظامی کارکردگی کو مزید مؤثر بنانے کے لیے ایک اہم انتظامی اقدام اٹھاتے ہوئے چار نئے آپریشنل زونز قائم کر دیے ہیں۔ یہ اقدام میئر کراچی و چیئرمین واٹر کارپوریشن بیرسٹر مرتضیٰ وہاب کی خصوصی ہدایت پر عمل میں لایا گیا ہے۔ اس سلسلے میں واٹر کارپوریشن کی جانب سے باضابطہ نوٹیفکیشن بھی جاری کر دیا گیا ہے۔ زون ون ضلع ملیر و کورنگی کے چیف انجینئر واٹر اینڈ سیوریج محمد علی شیخ ہوں گے۔ لانڈھی، کورنگی، ماڈل زون اور شاہ فیصل ٹاؤن کے سپرنٹنڈنگ انجینئر محمد اسلم اعوان تعینات کیے گئے ہیں۔ ابراہیم حیدری اور ملیر کے سپرنٹنڈنگ انجینئر رضوان علی خان جبکہ گڈاپ ٹاؤن کے سپرنٹنڈنگ انجینئر جاوید بھٹو مقرر کیے گئے ہیں۔ زون ٹو ضلع شرقی و جنوبی کے چیف انجینئر واٹر اینڈ سیوریج آفتاب عالم چانڈیو ہوں گے۔ چنیسر اور جناح ٹاؤن کے سپرنٹنڈنگ انجینئر عبدالغفار شیخ، گلشن اور صفورہ کے سپرنٹنڈنگ انجینئر عبدالحق شیخ، لیاری ٹاؤن کے محمد رحیم پلیجو، جبکہ صدر اور کلفٹن کے سپرنٹنڈنگ انجینئر انور میمن اپنی خدمات انجام دیں گے۔ زون تھری ضلع غربی و کیماڑی کے چیف انجینئر واٹر اینڈ سیوریج غلام محمد ححب ہوں گے۔ بلدیا، ماڑی پور اور مورڑو میر بحر کے سپرنٹنڈنگ انجینئر عثمان خاصخیلی جبکہ اورنگی، مومن آباد اور منگھوپیر کے سپرنٹنڈنگ انجینئر عبدالوحید شیخ تعینات کیے گئے ہیں۔ زون فور ضلع وسطی و سہراب گوٹھ ٹاؤن کے چیف انجینئر واٹر اینڈ سیوریج شاہ رخ حسین ہوں گے۔ گلبرگ، ناظم آباد اور لیاقت آباد کے سپرنٹنڈنگ انجینئر ابرار حسین جبکہ نیو کراچی، نارتھ ناظم آباد اور سہراب گوٹھ ٹاؤن کے سپرنٹنڈنگ انجینئر نہال دانش مقرر کیے گئے ہیں۔ اس موقع پر چیف ایگزیکٹو آفیسر احمد علی صدیقی اور چیف آپریٹنگ آفیسر انجینئر اسداللہ خان نے کہا کہ اس انتظامی اقدام کا بنیادی مقصد ادارے کی آپریشنل کارکردگی کو مزید مؤثر بنانا، سروس ڈیلیوری کے نظام کو تیز اور فعال بنانا، پانی اور سیوریج کے مسائل کا بروقت حل ممکن بنانا، فیلڈ اسٹاف کے درمیان بہتر ہم آہنگی پیدا کرنا، اور شہریوں کو سہولت کے اعلیٰ معیار کے مطابق خدمات فراہم کرنا ہے۔ ان کا کہنا تھا کہ واٹر اینڈ سیوریج سروسز کی مؤثر فراہمی کے لیے انتظامی ڈھانچے کی مضبوطی وقت کی اہم ضرورت بن چکی ہے۔ انہوں نے مزید کہا کہ یہ اقدام میئر کراچی بیرسٹر مرتضیٰ وہاب کے وژن کے مطابق شہریوں کو بہتر سہولیات اور معیاری سروس ڈیلیوری فراہم کرنے کی جانب ایک اہم پیش رفت ہے، جس کے نتیجے میں شکایات کے فوری ازالے، پانی کی فراہمی کے مؤثر انتظام، اور سیوریج سسٹم میں تسلسل پیدا ہوگا۔
==========================
پہلا ون ڈے، پاکستان کا سری لنکا کو 300 رنز کا ہدف
پہلا ون ڈے، پاکستان کا سری لنکا کو 300 رنز کا ہدف
پاکستان نے سری لنکا کو پہلے ایک روزہ میچ میں 300 رنز کا ہدف دے دیا۔
راولپنڈی کرکٹ اسٹیڈیم پر کھیلے جارہے میچ میں پاکستان نے مقررہ 50 اوورز میں 5 وکٹ پر 299 رنز اسکور کیے۔
گرین شرٹس کی طرف سے آل راؤنڈر سلمان علی آغا نے سری لنکن بولنگ لائن کے خلاف شاندار ناقابل شکست سنچری اسکور کی۔
سلمان علی آغا نے 83 گیندوں پر 9 چوکوں کی مدد سے سنچری بنائی، وہ 87 گیندوں پر 105 رنز کے ساتھ ناٹ آؤٹ پویلین لوٹے، یہ ان کی ایک روزہ کرکٹ کی دوسری سنچری ہے۔
چھٹی وکٹ پر سلمان علی آغا کے ساتھ 66 رنز کی شراکت بنانے والے محمد نواز 36 رنز بناکر ناٹ آؤٹ رہے۔
دیگر کھلاڑیوں میں حسین طلعت 62، فخر زمان 32 اور بابراعظم 29 رنز کے ساتھ نمایاں بیٹر تھے جبکہ صائم ایوب 6 اور محمد رضوان نے 5 رنز بنائے۔
سری لنکا کے بولر ونندوہسارانگا نے 54 رنز کے عوض 3 پاکستانی بیٹرز کو پویلین بھیجا۔
3 میچز کی سیریز کے پہلے میچ میں سری لنکا نے پاکستان کے خلاف ٹاس جیت کر فیلڈنگ کا فیصلہ کیا تھا۔
ٹاس جیت کر ہم بھی فیلڈنگ ہی کرتے:شاہین آفریدی
ٹاس کے موقع پر گفتگو کرتے ہوئے قومی ٹیم کے کپتان شاہین شاہ آفریدی نے کہا تھا کہ ٹاس جیت کر ہم بھی فیلڈنگ ہی کرتے، ہم اس سیریز میں بھی پچھلی سیریز کی طرح اچھا کرنے کی کوشش کریں گے۔
سری لنکن کپتان چیریتھ اسالنکا نے کہا کہ ہم سیریز میں اچھا کھیل پیش کرنے کی کوشش کریں گے۔
پاکستان پلیئنگ الیون
پاکستان پلیئنگ الیون میں فخر زمان، صائم ایوب، بابر اعظم، محمد رضوان، سلمان علی آغا، حسین طلعت، محمد نواز، فہیم اشرف، نسیم شاہ، شاہین آفریدی اور حارث رؤف شامل ہیں۔
یاد رہے کہ دوسرا ون ڈے 13 نومبر جبکہ تیسرا 15 نومبر کو کھیلا جائے گا۔
