
لاہور میں بہت جلد ایک نئی کشش آنے والی ہے….صوبائی وزیر عظمیٰ بخاری کہتی ہیں…لاہور میں نہر کے آخر میں جلد ہی 3 منزلہ شپ ریسٹورنٹ کھولا جائے گا اور وہاں نئی فوڈ چین کھل جائے گی۔
=====================
وزیراعظم شہباز شریف دوروزہ سرکاری دورے پرباکو پہنچ گئے، آذربائیجان کے یوم فتح کی تقریب میں خصوصی شرکت کریں گے
نیوز ڈیسک
November 07, 2025
باکو:وزیراعظم محمد شہباز شریف آذربائیجان کے دوروزہ سرکاری دورے پرباکو پہنچ گئے۔حیدر علیؤف انٹرنیشنل ایئرپورٹ پر اول نائب وزیراعظم یعقوب ایوبوف، اول نائب وزیر خارجہ فریز رضایوف، پاکستانی سفیر قاسم محی الدین اور اعلیٰ حکا م نے ان کااستقبال کیا۔وزیر اطلاعات عطاء اللہ تارڑ بھی وزیر اعظم کے ہمراہ ہیں۔
محمد شہبازشریف صدر الہام علیوف کی دعوت پر آذربائیجان کے یوم فتح کی تقریب میں خصوصی شرکت کریں گے۔پاکستان اورآذربائیجان کی قیادت کے درمیان ملاقات میں دوطرفہ تعلقات پر تبادلہ خیال ہوگا۔ وزیراعظم شہباز شریف اور صدرالہام علیوف کی ملاقات میں تجارت ، سرمایہ کاری، توانائی، دفاع، تعلیم اور علاقائی رابطوں سمیت مختلف شعبوں میں تعاون کو مزید وسعت دینے اور نئی راہوں کی نشاندہی پر توجہ مرکوز کی جائے گی۔
پاکستان اور آذربائیجان کے دیرینہ برادرانہ تعلقات جڑیں مشترکہ عقیدے، تاریخ، ثقافت اور باہمی اعتماد سے جڑی ہیں۔ دونوں ملکوں کے درمیان علاقائی اور بین الاقوامی فورمز پر بھی قریبی تعاون ہے۔ وزیراعظم محمد شہبازشریف کا یہ دورہ آذربائیجان کی خودمختاری اور علاقائی سالمیت کے لیے پاکستان کی ٹھوس حمایت اور اسٹریٹجک شراکت داری کو مستحکم کرنےکے عزم کا اعادہ ہے۔























