لاہور، 7 نومبر 2025ء — سیکرٹری ہاؤسنگ، اربن ڈویلپمنٹ اینڈ پبلک ہیلتھ انجینئرنگ نورالامین مینگل کی زیرِ صدارت اجلاس میں لاہور کی خوبصورتی میں اضافے اور ماحولیاتی آلودگی کے تدارک کے لیے جاری منصوبوں کا تفصیلی جائزہ لیا گیا۔ اجلاس میں ڈی جی پی ایچ اے لاہور منصور احمد نے “لنگز آف لاہور” اور “رنگ فارسٹیشن” منصوبوں سمیت دیگر ماحول دوست اقدامات پر بریفنگ دی۔
ڈی جی پی ایچ اے نے بتایا کہ لاہور کی مختلف ڈرینز کے اطراف 45 ہزار بانس کے پودے لگانے کا عمل جاری ہے جبکہ اب تک 14 ہزار سے زائد پودے لگا دیے گئے ہیں۔
سیکرٹری ہاؤسنگ نورالامین مینگل نے ہدایت کی کہ لنگز آف لاہور منصوبے کے تحت پھل دار اور پھول دار درختوں کی اقسام میں مزید اضافہ کیا جائے تاکہ شہر کی خوبصورتی کے ساتھ ساتھ ماحولیاتی بہتری بھی ممکن ہو۔ انہوں نے تمام درختوں کی حفاظت اور نگرانی کے لیے جیو ٹیگنگ کا نظام متعارف کروانے کی ہدایت بھی جاری کی۔
مزید برآں، رنگ فارسٹیشن منصوبے کے تحت بڑی عمر کے درخت لگانے پر زور دیا گیا تاکہ فوری طور پر سبزہ اور سایہ فراہم کرنے والے درخت شہر کے ماحولیاتی توازن میں کردار ادا کر سکیں۔
سیکرٹری ہاؤسنگ کے مطابق ماحولیاتی آلودگی کے تدارک میں ہارٹیکلچر ایجنسیوں کا کردار نہایت اہم ہے۔ انہوں نے کہا کہ سینئر منسٹر پنجاب مریم اورنگزیب کی نگرانی میں ماحول دوست پالیسیوں کا اطلاق کیا جا رہا ہے، جن کے مثبت اثرات جلد نمایاں ہوں گے۔
نورالامین مینگل نے تمام متعلقہ اداروں کو ہدایت کی کہ ماحول دوست منصوبوں کو کم سے کم وقت میں مکمل کیا جائے تاکہ وزیر اعلیٰ پنجاب مریم نواز شریف کی ہدایت کے مطابق بصری اور ماحولیاتی آلودگی کا تدارک یقینی بنایا جا سکے۔
