ڈائریکٹر جنرل ایس بی سی اے مزمل ہالیپوٹو کا ماحول دوست تعمیرات کے لیے بائی لاز میں ترمیم پر زور
پائیدار ترقی کے لیے طرزِ فکر اور قانونی فریم ورک میں تبدیلی ناگزیر ہے۔ ڈی جی ایس بی سی اے
کراچی 06 نومبر ۔ڈائریکٹر جنرل سندھ بلڈنگ کنٹرول اتھارٹی (ایس بی سی اے) مزمل ہالیپوٹو نے کہا ہے کہ ماحول دوست تعمیرات کے فروغ اور پائیدار ترقی کے اہداف کے حصول کے لیے بلڈنگ بائی لاز میں ترمیم اور قانونی فریم ورک کی بہتری وقت کی اہم ضرورت ہے۔وہ کراچی کے ایک نجی ہوٹل میں منعقدہ پاکستان گرین بلڈنگ کانفرنس میں شرکت کے بعد میڈیا سے گفتگو کر رہے تھے۔ڈی جی ایس بی سی اے نے کہا کہ دہائیوں سے جمع ہوتے مسائل اب ایک دوسرے سے جڑ کر نظامی پیچیدگیاں پیدا کر چکے ہیں۔ تعمیراتی صنعت میں سب سے اہم پہلو لاگت ہے، جبکہ گرین بلڈنگز کے لیے منصوبہ بندی، ماہرین کی رہنمائی اور اضافی اخراجات درکار ہوتے ہیں۔ تاہم وقت کے ساتھ یہ سوچ بدل جائے گی۔انہوں نے کہا کہ دنیا بھر کے ممالک پائیدار ترقی کے اہداف پر عمل پیرا ہیں اور توانائی، صحت سمیت مختلف شعبوں میں دس سے بیس سال کی ڈیڈ لائنز مقرر کی گئی ہیں۔ اس موقع پر پاکستان کے لیے ضروری ہے کہ اپنے بائی لاز میں تبدیلیاں لا کر عالمی پائیداری کے معیار سے ہم آہنگ ہو۔مزمل ہالیپوٹو نے کہا کہ جب تک ماحول دوست تعمیرات کو فروغ نہیں دیا جائے گا، صحت مند مستقبل ممکن نہیں ہوگا۔ متبادل توانائی کے استعمال سے ہم سستی اور پائیدار بجلی کے ذرائع حاصل کر سکتے ہیں۔ڈی جی ایس بی سی اے نے کہا کہ انہیں عہدہ سنبھالے ایک ماہ ہوا ہے اور حکومت ادارے کے طریقہ کار میں بنیادی اصلاحات لانا چاہتی ہے۔ “ایس بی سی اے کا قانونی فریم ورک، ریگولیشنز اور ایکٹ پرانے ہو چکے ہیں۔ ہم نے نیا ڈرافٹ تیار کر لیا ہے جو جلد کابینہ سے منظور کرایا جائے گا۔انہوں نے بتایا کہ ادارے میں متعدد انتظامی تبدیلیاں کی گئی ہیں جن کے مثبت نتائج جلد ظاہر ہوں گے۔ “اس وقت صوبے بھر میں ایس بی سی اے کے ملازمین کی تعداد 1381 ہے۔ اگر تمام افسران کو غیرقانونی تعمیرات کی جانچ پر لگا دیا جائے تو ان کی واپسی تک ایک نئی عمارت کھڑی ہو جاتی ہے۔ اس سے ظاہر ہوتا ہے کہ ادارے میں استعداد کار کے مسائل موجود ہیں جن پر کام جاری ہے۔ڈی جی نے کہا کہ افرادی قوت میں اضافہ اور ڈیجیٹلائزیشن وقت کی ضرورت ہے۔ “ہم اب چیزوں کو مینوئل انداز میں نہیں چلا سکتے۔ ڈیجیٹل نظام شفافیت اور کارکردگی دونوں کو بہتر بنائے گا۔مزمل ہالیپوٹو نے سنگل ونڈو فیسیلیٹی کو ایس بی سی اے کا کامیاب اور مؤثر منصوبہ قرار دیا۔ انہوں نے کہا کہ “یہ بہترین تصور ہے جو عملی طور پر کامیابی سے کام کر رہا ہے۔ کسی یونٹ کے لیے آن لائن درخواست دینے پر پندرہ دن میں منظوری مل جاتی ہے اور اس سہولت کی کامیابی کی شرح 99 فیصد ہے۔انہوں نے کہا کہ ایس بی سی اے چار اقسام کی عمارتوں کو ریگولیٹ کرتا ہے، اور جب تمام مراحل مکمل طور پر آن لائن ہو جائیں گے تو ادارے کی کارکردگی میں نمایاں بہتری آئے گی۔
