پاکستانیوں کیلیے خوشخبری؛ اٹلی حکومت کا نوکریاں دینے کا اعلان
November 6, 2025
ویب ڈیسک
اٹلی کی حکومت نے 2026 سے 2028 تک تقریباً چار لاکھ ستانوے ہزار سے زائد غیرملکیوں کو مختلف شعبوں میں روزگار کے مواقع فراہم کرنے کا اعلان کر دیا۔
غیر ملکی خبر رساں ادارے کی رپورٹ کے مطابق یہ فیصلہ ڈیکری آف دی پریذیڈنٹ آف دی کونسل آف منسٹرز (DPCM) کے تحت کیا گیا ہے جو سرکاری گزٹ میں شائع ہو چکا ہے۔ یہ پالیسی فلو ڈیکری کے نام سے جانی جاتی ہے جس کے تحت غیر یورپی ممالک کے شہری، خصوصاً پاکستانی کارکنان، قانونی طور پر اٹلی میں کام حاصل کر سکیں گے۔
سرکاری اعداد و شمار کے مطابق 2026 میں ایک لاکھ چونسٹھ ہزار آٹھ سو پچاس، 2027 میں ایک لاکھ پینسٹھ ہزار آٹھ سو پچاس اور 2028 میں ایک لاکھ چھیاسٹھ ہزار آٹھ سو پچاس نوکریوں کی پیشکش کی جائے گی۔ ان میں موسمی، غیر موسمی اور خود روزگار کے مواقع شامل ہوں گے۔
حکام کے مطابق موسمی ملازمتیں زیادہ تر زراعت اور سیاحت کے شعبوں میں ہوں گی جبکہ غیر موسمی کاموں میں تعمیرات، لاجسٹکس، مینوفیکچرنگ اور گھریلو دیکھ بھال کے شعبے شامل ہیں۔
2026 کے لیے درخواستوں کی مجوزہ تاریخیں بھی جاری کر دی گئی ہیں جن کے مطابق زراعت کے شعبے میں لازمتوں کے لیے درخواستیں 12 جنوری، سیاحت کے شعبے کے لیے 9 فروری، غیر موسمی روزگار کے لیے 16 فروری اور گھریلو دیکھ بھال کے شعبے کے لیے 18 فروری کو جمع کرائی جا سکیں گی۔
نیسلے کا عالمی سطح پر 16 ہزار ملازمتیں ختم کرنے کا اعلان
پاکستان سے اٹلی کا ورک ویزا حاصل کرنے کے لیے امیدواروں کو سب سے پہلے کسی اطالوی آجر سے ملازمت کی پیشکش حاصل کرنا ہوگی۔ اس کے بعد آجر کو آن لائن پورٹل کے ذریعے ورک پرمٹ یا نُلا اوستا کے لیے درخواست دینا ہوگی۔
اجازت نامہ منظور ہونے کے بعد پاکستانی کارکن اٹلی کے سفارتخانے یا قونصلیٹ میں ٹائپ ڈی ورک ویزا کے لیے درخواست دے سکتا ہے۔ درخواست کے ساتھ پاسپورٹ، ورک کنٹریکٹ، نُلا اوستا، مالی وسائل کا ثبوت اور ہیلتھ انشورنس جمع کرانا ضروری ہوگا۔
اٹلی پہنچنے کے بعد کارکن کو آٹھ دن کے اندر رہائشی اجازت نامہ حاصل کرنا ہوگا تاکہ وہ قانونی طور پر ملک میں کام اور قیام کر سکے۔ اٹلی کی حکومت نے واضح کیا ہے کہ مزدوروں کی ضروریات کے مطابق یہ کوٹے بڑھائے بھی جا سکتے ہیں اور خالی نشستوں کو اگلے سال کے کوٹے میں شامل کیا جا سکتا ہے۔
موسمی کارکن بعد میں طویل المدتی یا غیر موسمی ملازمت میں تبدیلی کے اہل ہو سکتے ہیں۔ یہ فیصلہ اٹلی میں مزدوروں کی کمی کو پورا کرنے کے ساتھ ساتھ پاکستانیوں سمیت دیگر غیر یورپی شہریوں کے لیے یورپ میں قانونی روزگار کے نئے مواقع پیدا کرے گا۔
