اسلام آباد:آئی ٹی و ٹیلی کام کی وفاقی وزیر شزہ فاطمہ خواجہ نے نیشنل ریڈیو ٹیلی کمیونیکیشن کارپوریشن ہری پور کا دورہ کیا جہاں انہوں نے گوگل کروم بُک اسمبلی لائن کے منصوبے پر پیش رفت کا جائزہ لیا گیا۔
آئی ٹی و ٹیلی کام کی وفاقی وزیر شزہ فاطمہ خواجہ نے ہری پور میں قائم این آر ٹی سی کا دورہ کیا۔اس موقع پر امریکی ناظم الامور نٹالی اے بیکر بھی ان کے ہمراہ تھیں۔وفد میں گوگل گلوبل کے منیجنگ ڈائریکٹراورکنٹری ڈائریکٹر سمیت دیگر حکام بھی شامل تھے۔
حکام کی جانب سے وفد کو این آر ٹی سی کے اقدامات اور کروم بُک اسمبلی لائن منصوبے پر تفصیلی بریفنگ دی گئی ۔وفاقی وزیر شزہ فاطمہ نے کروم بُک اسمبلی لائن کا دورہ کیا اور یہاں بننے والی ڈیوائسز کامعائنہ کیا۔یہ منصوبہ گوگل، الائیڈ آسٹریلیا، این آر ٹی سی اور ٹیک ویلی پاکستان کے اشتراک سے شروع کیا گیا ہے۔
اس موقع پروفاقی وزیرشزہ فاطمہ خواجہ نے کہا کہ یہ منصوبہ پاکستان کی ڈیجیٹل اور معاشی خود انحصاری کی جانب ایک سنگِ میل ہے۔جس سے مقامی سطح پر نوجوانوں کو سستی اور معیاری ڈیجیٹل ڈیوائسز دستیاب ہوں گی اورروزگار کے مواقع پیدا ہوں گے۔
انہوں نے کہا کہ پاکستان اب سافٹ ویئر سروسز سے ہارڈ ویئر مینوفیکچرنگ کی جانب عملی قدم بڑھا چکا ہے۔وزیر آئی ٹی نے اس عزم کا اظہار کیا کہ حکومت پاکستان ٹیکنالوجی مینوفیکچرنگ اور ڈیجیٹل ترقی کے فروغ کیلئے پرعزم ہے جس سے ملک کی آئی ٹی برآمداد میں بھی اضافہ ہو گا
