کراچی والے ڈمپر مافیا کے رحم و کرم پر، عوام کی جان و مال داؤ پر لگی ہوئی ہے۔
انتظامیہ خواب غفلت میں، کراچی کی سڑکیں موت کا میدان بن چکی ہیں۔تاجرالائنس
کراچی (5 نومبر2025)
کراچی تاجر الائنس کے چیئرمین ایاز میمن موتی والا نے کہا ہے کہ ایسا محسوس ہوتا ہے کہ ڈمپر مافیا اس شہر کے حکمرانوں سے بھی زیادہ طاقتور ہو چکا ہے۔ روزانہ کراچی کی سڑکوں پر ڈمپر انسانوں کی زندگیوں کو روندتے پھر رہے ہیں، مگر افسوس! کسی ادارے کو توفیق نہیں ہوتی کہ ان عناصر کے خلاف کارروائی کرے۔انہوں نے کہا کہ کراچی پہلے ہی پانی، بجلی اور گیس کی بندش کے باعث اذیت ناک صورتحال سے گزر رہا ہے۔ عوام مہنگائی، بے روزگاری اور دہشت کے بوجھ تلے دبے ہوئے ہیں، اور اب اس پر ڈمپر مافیا نے شہریوں کی زندگیوں کو کچلنے کا نیا ٹھیکہ لے لیا ہے۔ شہریوں کی بے بسی دیکھ کر دل خون کے آنسو روتا ہے۔ایاز میمن موتی والا نے مزید کہا کہ حکومتی ادارے اور انتظامیہ اگر اپنی ذمہ داری پوری نہیں کر سکتے تو کم از کم شہریوں کو تحفظ فراہم کرنے کے لئے کوئی مؤثر حکمتِ عملی ہی بنا دیں۔ کراچی کے شہری روز نکلتے وقت اس خوف کا شکار ہوتے ہیں کہ پتہ نہیں شام کو گھر واپس جا سکیں گے یا نہیں۔انہوں نے مطالبہ کیا کہ ڈمپر مافیا کے خلاف فوری آپریشن کیا جائے، غیرقانونی اور بےقابو گاڑیوں کو سڑکوں سے ہٹایا جائے اور شہریوں کی جانوں کے تحفظ کے لیے ہنگامی اقدامات کیے جائیں۔ کراچی کے لوگوں کا صبر مزید آزمایا نہ جائے۔
