راولپنڈی:وفاقی وزیر داخلہ محسن نقوی اور وزیر مملکت داخلہ طلال چوہدری نے شہید لیفٹیننٹ کرنل جنید کے گھر جا کر ان کی والدہ، فیملی اور بچوں سے ملاقات کی۔ دونوں رہنماؤں نے سوگوار خاندان کے ساتھ دلی ہمدردی کا اظہار کیا اور شہید کے درجات کی بلندی کے لیے دعا کی۔
محسن نقوی نے شہید کی والدہ اور اہل خانہ کے حوصلے کو خراج تحسین پیش کرتے ہوئے کہا کہ”آپ جیسی باہمت ماں کا حوصلہ دیکھ کر ہمارا حوصلہ اور بڑھ گیا ہے۔ شہداء کے خون کا ایک ایک قطرہ وطن کے تحفظ کی ضمانت ہے۔” انہوں نے مزید کہا کہ شہداء نے اپنی جانیں قربان کر کے دہشتگردوں کے عزائم کو خاک میں ملایا ہے۔
وزیر مملکت طلال چوہدری نے شہداء کو قوم کا فخر اور سرمایۂ افتخار قرار دیا اور کہا کہ قوم اپنے ہیروز کی قربانیوں کو کبھی نہیں بھولے گی۔
شہید لیفٹیننٹ کرنل جنید کی والدہ نے کہا کہ “میرے بیٹے کو شہادت کی بڑی سعادت نصیب ہوئی، اس نے ملک کا پرچم بلند کیا۔” انہوں نے اپنے دونوں پوتوں کو پاک فوج میں شامل کرنے کا عزم بھی ظاہر کیا۔
لیفٹیننٹ کرنل جنید چند روز قبل اورکزئی میں بھارتی سپانسرڈ دہشتگردوں کے خلاف بہادری سے لڑتے ہوئے شہادت کے رتبے پر فائز ہوئے تھے۔
