پریس ریلیز
سماجی تنظیم این ڈی ایف نے گاؤں گپچانی میں پانی کا منصوبہ مکمل کیا، صاف پینے کا پانی گھروں کے دروازوں تک پہنچا دیا
نواب شاھ: نیشنل ڈس ایبلٹی اینڈ ڈوالپمنٹ فورم (این ڈی ایف) پاکستان نے گپچانی گاؤں میں صاف میٹھے پانی کا منصوبہ کامیابی سے مکمل کر لیا ہے، جہاں خواتین کو پہلے صاف پینے کے پانی کے لیے 3 کلو میٹر دور جانا پڑتا تھا۔
اس موقع پر این ڈی ایف پاکستان نواب شاہ کے صدر حاجی عابد لاشاری نے کہا کہ یہ منصوبہ التزام ریلیف سوسائٹی ملائشیا کے تعاون سے شروع کیا گیا، جس نے تین “آبیار نلکے” فراہم کیے۔ پانی کی سپلائی لائن 3 کلو میٹر دور سے گاؤں تک پہنچائی گئی ہے تاکہ دیہاتیوں کو محفوظ، صاف شفاف اور پائیدار پانی تک رسائی حاصل ہو۔
مقامی برادری نے گھروں تک صاف پانی کی سہولت میسر ہونے پر دلی شکریہ ادا کیا۔ انہوں نے التزام ریلیف سوسائٹی کی ٹیم کے اراکین محمد شاہ اور شاھ رول کے ساتھ ساتھ این ڈی ایف کی ٹیم کے اراکین عابد لاشاری، طارق حسین چنڑ اور منٹھار علی مگسی کی کوششوں کو بھی سراہا۔
گاؤں کے نیک مرد حضرات نے کہا کہ پانی خدا کی عظیم نعمت اور زندگی کی بنیادی ضرورت ہے۔ ماضی میں انہیں پانی لانے کے لیے سخت مشکلات کا سامنا تھا، جس کے لیے وہ گدھا گاڑیاں، موٹر سائیکلیں استعمال کرتے یا سر پر پانی اٹھا کر لاتے تھے۔ اب اس منصوبے کے ذریعے انہیں ایک خدا کی طرف سے عطا کردہ سہولت میسر آئی ہے جو مقامی غریب لوگوں کے لیے بڑی نعمت ہے۔
