لاڑکانہ(بیورورپورٹ) لاڑکانہ پولیس نے دو الگ الگ مقامات پر ڈاکوؤں سے مقابلے میں 2 ڈاکوؤں کو زخمی حالت میں گرفتار کرکے اسلحہ اور موبائل فون برآمد کرنے کا دعویٰ کیا ہے، اس حوالے سے ایس ایس پی لاڑکانہ احمد فیصل چودھری نے بتایا کہ تھانہ ولید کی حدود کھیڈکر روڈ نزد عرب پیر اور تھانہ سول لائن کی حدود لوکوشیڈ والے علاقے میں پولیس اور ڈاکوؤں کے درمیان دو مقابلے ہوئے، مقابلوں کے دوران دو طرفہ فائرنگ کے نتیجے میں پولیس نے 2 ڈاکوؤں کو زخمی حالت میں پسٹلز اور موبائل فون سمیت گرفتار کرلیا گیا ہے، انہوں نے بتایا کہ تھانہ ولید کی حدود سے زخمی حالت میں گرفتار ڈاکو کی شناخت عبدالکریم عمرانی اور تھانہ سول لائن کی حدود سے زخمی حالت میں گرفتار ڈاکو کی شناخت عرفان پہنور کے ناموں سے ہوٸی ہے، ابتدائی معلومات اور سی سی ٹی وی شواہد کے مطابق مذکورہ ڈاکو تھانہ ولید کی حدود میروخان روڈ والے علاقے میں ایل پی جی دکان میں ڈکیتی، تھانہ حیدری کی حدود نادرا آفس والے علاقے میں یوسف کریانہ شاپ میں ڈکیتی، تھانہ سول لائن کی حدود لاھوری محلہ کریانہ شاپ میں ڈکیتی، تھانہ سول لائن کی حدود رسول آباد اسکریپ شاپ میں ڈکیتی، تھانہ سول لائن کی حدود پیپلز کالونی والے علاقے سے موٹرسائیکل چھیننے، تھانہ ماھوٹا کی حدود سندھ گرین سوسائٹی کریانہ شاپ میں ڈکیتی، تھانہ تعلقہ اور تھانہ کنگا کی حدود سے موٹرسائیکل چھیننے سمیت حالیہ ہونے والی تقریباً ایک درجن وارداتوں میں ملوث ہیں، اسی گینگ سے تعلق رکھنے والے تیسرے سرغنہ ڈاکو قربان سنجرانی کو بھی زخمی حالت میں گرفتار کرلیا جا چکا ہے، جس سے مزید تفتیش جاری ہے، انہوں نے بتایا کہ ڈاکو عبد الکریم عمرانی کے خلاف ولید، تعلقہ، سچل پر 7 سے زائد سنگین نوعیت کے مقدمات درج ہیں، ڈاکو عرفان پنہور جو پہلے جیل جا چکا ہے اس کے خلاف ولید، سول لائن، تعلقہ، لاشاری پر 7 سے زائد سنگین نوعیت کے مقدمات درج ہیں جبکہ ڈاکو قربان سنجرانی کے خلاف ولید، سول لائن، تعلقہ پر 5 سے زائد مقدمات درج ہیں۔
