لاڑکانہ(بیورورپورٹ) دڑی ٹاؤن کی جانب سے 14 اگست یومِ آزادی اور معرکۂ حق کی خوشی میں 13 اگست کو آرٹس کونسل آف پاکستان لاڑکانہ میں جشنِ آزادی کی تقریب منعقد کرنے کا اعلان کیا گیا ہے، جس میں ملک کے نامور گلوکار اور مزاحیہ فنکار شرکت کریں گے، تقریب میں شاندار آتشبازی کا مظاہرہ کرکے جشنِ آزادی کا کیک کاٹا جائے گا، اس حوالے سے دڑی ٹاؤن کے چیئرمین شاہ رخ انور سیال نے لاڑکانہ پریس کلب میں پریس کانفرنس کرتے ہوئے کہا کہ ملک کی آزادی کے لیے ہمارے بزرگوں نے قربانیاں دیں اور تکالیف برداشت کیں، جنہیں خراجِ تحسین پیش کرنے کے ساتھ ساتھ پاکستان فوج کی جانب سے بھارت کو منہ توڑ جواب دے کر سرخرو ہونے کی خوشی میں 13 اگست کو آرٹس کونسل لاڑکانہ میں جشن آزادی تقریب منعقد کی جائے گی، جس کے لیے سیکیورٹی کے سخت انتظامات کیے گئے ہیں، انہوں نے بتایا کہ جشنِ آزادی تقریب میں شاندار آتشبازی کا مظاہرہ اور 14 اگست کا کیک کاٹا جائے گا، جس میں ملک کی نامور گلوکارہ صنم ماروی، مزاحیہ فنکار علی گل ملاح، سہراب سومرو، صوفی گائیک، اسلام آباد و کراچی کے مشہور بینڈز کے فنکار اپنے فن کا مظاہرہ کریں گے، تقریب کے اختتام پر ملکی سلامتی اور خوشحالی کے لیے خصوصی دعا بھی کی جائے گی، شہریوں سے اپیل کی گئی ہے کہ وہ اپنے اہل خانہ سمیت تقریب میں شرکت کریں، شاہ رخ انور سیال نے مزید بتایا کہ ڈری ٹاؤن کی جانب سے 14 اگست کے سلسلے میں تمام علاقوں کو قومی پرچموں اور لائٹنگ سے سجایا گیا ہے، پہلے مرحلے میں بیشتر اسکولوں، مساجد اور امام بارگاہوں کو سولر سسٹم پر منتقل کر کے سی سی ٹی وی کیمرے نصب کیے گئے، جس سے امن و امان کی صورتحال میں بہتری آئی ہے، انہوں نے کہا کہ 14 اگست کے حوالے سے میرا پیغام ہے کہ ہمیں اپنے اختلافات ختم کرکے سبز ہلالی پرچم تلے اپنے ملک کی ترقی و خوشحالی کے لیے جدوجہد کرنی چاہیے تاکہ آنے والی نسلوں کو ایک خوشحال پاکستان دے سکیں۔
