نمبر: بی آئی ای/پی آر/062/ 2025 تاریخ: 15 مئی 2025ء
پریس ریلیز
اعلیٰ ثانوی تعلیمی بورڈ کراچی کے تحت انٹرمیڈیٹ کے سالانہ امتحانات برائے 2025ء کامیابی سے جاری ہیں۔ امتحانات کے دسویں روز صبح کی شفٹ میں سائنس پری انجینئرنگ،پری میڈیکل اور ہوم اکنامکس کا کیمسٹری کا پرچہ لیاگیا۔ چیئرمین اعلیٰ ثانوی تعلیمی بورڈ کراچی غلام حسین سوہو کی خصوصی ہدایات پر ڈپٹی کنٹرولر زاہد رشید اور رکن کنٹرول روم کمیٹی پروفیسر نہال اختر پر مشتمل ٹیم نے پریمیئر گورنمنٹ کالج نمبر ایک جبکہ آڈٹ آفیسر زاہد لاکھو نے ٹیم کے ہمراہ گورنمنٹ ڈگری بوائز کالج گلستان جوہر اور گورنمنٹ کالج آف فزیکل ایجوکیشن کا دورہ کرکے امتحانی عمل کا جائزہ لیا اور مجموعی طور پر اطمینان کا اظہار کیا۔ گورنمنٹ پریمیئر کالج میں کچھ کمروں میں پنکھوں کی کمی تھی اس مسئلہ کو فوری طور پر حل کروایا گیا۔ چیئرمین انٹربورڈ کراچی غلام حسین سوہو اور ناظم امتحانات زرینہ راشد کنٹرول روم سے ڈیجیٹل لنک کے ذریعہ امتحانی مراکز پر جاری امتحانی عمل کی موثر نگرانی کررہے ہیں۔
نمبر: بی آئی ای/پی آر/061/ 2025 تاریخ: 14 مئی 2025ء
پریس ریلیز
اعلیٰ ثانوی تعلیمی بورڈ کراچی کے تحت انٹرمیڈیٹ کے سالانہ امتحانات برائے 2025ء کامیابی سے جاری ہیں۔ امتحانات کے نویں روز شام کی شفٹ میں سائنس جنرل کا فزکس پرچہ اول لیا گیا۔ چیئرمین انٹربورڈ غلام حسین سوہو نے امتحانی مراکز کے سینٹر سپرنٹنڈنٹس کو طلبہ کو گرمی کی شدت سے بچانے کیلئے ٹھنڈے پانی سمیت دیگر انتظامات کیلئے تاکید کی۔ دریں اثناء سراج الدولہ گورنمنٹ کالج (ایوننگ) میں پرچہ شروع ہونے کے بعد پرچہ آؤٹ کرنے والے طالب علم کو کنٹرول روم ٹیم کی نشاندہی پر پکڑ لیا گیا، مذکورہ طالب علم سے وہ موبائل بھی برآمد کرلیا گیا جس کے ذریعہ اس نے پرچہ امتحانی مرکز سے باہر بھیجا تھا۔
