جیوے پاکستان کے قارئین کی دلچسپی اور ریکارڈ کی درستگی کے لیے نیا ناظم آباد انتظامیہ کی جانب سے سامنے آنے والا تازہ موقف من عن یہاں پیش خدمت ہے
نیاناظم آباد کے بارے میں آپکے آرٹیکل میں 2020 کے بعد کےحقائق کو بالکل نظر انداز کرکے جو سوالات اٹھائے گئے ہیں ان کا حقیقت حال سے دور دور کا بھی تعلق نہیں ہے۔ آرٹیکل میں قارئین کی سوچ کا رخ اس جانب موڑنے کی کوشش کی گئی ہے کہ بقول آپکے “نیا ناظم آباد کی انتظامیہ نے دعویٰ کیا ہے کہ انہوں نے تمام احتیاطی تدابیر اختیار کر لی ہیں، ماہرین اور انجینئرز کی تجاویز پر عمل کرتے ہوئے نئی ڈرینج پلاننگ کی گئی ہے، اور اب رہائشیوں کو پانی بھرنے سے خوفزدہ ہونے کی ضرورت نہیں۔”
نیاناظم آباد انتظامیہ اللّٰه کے فضل سے یہ دعویٰ بڑے اعتماد سے اپنے قائم کئے ہوئے پانی کے اخراج کے نظام کی کامیابی کے بعد کرتی ہے۔ اگر آپ 2020 کے بعد کے چار سالوں کو دیکھیں تو اس میں بارشوں کے موسم میں نیاناظم آباد کے رہائشیوں کو پوری ابادی میں پانی بھرنے اور اس سے پیدا شدہ کسی بھی مسئلہ کا سامنا نہیں کرنا پڑا۔
ہمیں افسوس سے کہنا پڑتا ہے کہ صحافت کے بنیادی اصولوں کو بالائے طاق رکھ کر یہ آرٹیکل کسی تحقیق اور متعلقہ سوالات پوچھے بغیر قارئین کے دل میں بالواسطہ اور بلا واسطہ شکوک و شبہات پیدا کرنے کے لئے شائع کیا گیا ہے۔
آرٹیکل میں مزید گولا بارود اس طور چلایا گیا ہے “کیا محض چند ٹیکنیکل تبدیلیاں اتنی کافی ہیں؟” اس کی تصدیق کرنے کے لئے سب سے مؤثر طریقہ کار تو یہ ہونا چاہئے تھا کہ اس سوال کا جواب جاننے کے لئے آرٹیکل لکھنے والا آکر نیاناظم آباد میں بسنے والے رہائشیوں سے انکے پچھلے چار سالوں کے تجربہ اور 2020 کے بعد کے مون سون بارشوں کے سیزن میں جو حالات پیدا ہوئے ان کے بارے میں معلومات اکٹھی کرتا اور سچ جانتا۔ لیکن اس کی بجائے سوال پر سوال داغ کر کہ “کیا ان دعوؤں کی تصدیق ہو چکی ہے؟” اُن لوگوں کے ذہنوں میں شکوک و شبہات پیدا کرنے کی کوشش کی گئی ہے جو نیاناظم آباد میں نہیں رہتے اور اسکے بارے میں مکمل معلومات نہیں رکھتے۔
اس پر سونے پر سہاگہ ایک اور زہریلا سوال “کیا گذشتہ سالوں کی ناکامیوں کے بعد عوام کو یقین دلایا جا سکتا ہے کہ اب سب کچھ ٹھیک ہو جائے گا؟” ہمارے ساتھ نانصافی کے رویہ کا کھلا اظہار ہے۔ گزشتہ چار سال اس بات کا منہ بولتا ثبوت ہیں کہ الحمد للّٰه اب نیاناظم آباد میں بارشوں سے نبردآزما ہونے کا بہترین نظام موجود ہے۔ اس کے لئے ایمرجنسی ٹیمیں، سازو سامان، کوالیفائیڈ اور تجربہ کار سٹاف، سال بھر نالوں کی صفائی کا انتظام، اور کسی بھی ایمرجنسی سے نپٹنے کے لئے لائحہ عمل موجود ہے۔
اس سلسلہ میں یہ بتانا بھی ضروری ہے کہ نیاناظم آباد انتظامیہ کی کاوشوں کو مجموعی طور پر نہ صرف یہاں کے رہائشیوں نے قابل تعریف ٹھہرایا ہے بلکہ مارکیٹ نے بھی اس میں پراپرٹی کی قیمتوں میں کئی گنا اضافہ کرکے انتظامیہ کے اقدامات کی توثیق کی ہے۔
