فاطمہ جناح میڈیکل یونیورسٹی کی فیکلٹی کا ہنگامی اجلاس ,ملک کی موجودہ صورت حال کے پیش نظرفاطمہ جناح میڈیکل یونیورسٹی میں وائس چانسلر پروفیسر خالد مسعود گوندل کی سربراہی میں ڈینز، تمام ڈیپارٹمنٹس کے سربراہان اور پروفیسرز کا اجلاس منعقد ہوا ۔
اجلاس سے خطاب میں وائس چانسلر پروفیسر خالد مسعود گوندل کا کہنا تھا کہ ہم بحیثیت ڈاکٹرزاورقوم کسی بھی قسم کے غیر معمولی حالات سے نمٹنے کے لیے ہر وقت تیار ہیں۔ انہوں نے پاکستان کی سیکیورٹی فورسز کو والہانہ خراجِ تحسین پیش کیا۔ ان کا کہنا تھا کہ پاکستان کا بچہ بچہ اپنی افواج کے ساتھ سیسہ پلائی دیوار کی طرح کھڑاہے ۔ پاکستان کی عزت پر کسی قسم کی آنچ نہیں آنے دیں گے۔ پاکستان کی حفاظت مضبوط افواج کے پاس ہے جو امن و سلامتی کی ضامن ہے ۔
اجلاس میں شرکاء نے اس عزم کا اعادہ کیا کہ ڈاکٹرز کمیونٹی سمیت پوری قوم اپنی پاک فوج کے شانہ بشانہ کھڑی ہے۔ ایسی صورتحال میں پوری ڈاکٹرز کمیونیٹی پاکستانی عوام کی خدمت کے لیے ہمہ وقت تیار ہے۔کسی بھی ناگزیر صورت حال میں ڈاکٹرز کمیونیٹی کسی بھی قسم کے قربانی سے گریز نہیں کرے گی۔
پاک فوج سے اظہار یکجہتی اور بھارت کی بزدلانہ کاروائی کے خلاف وائس چانسلر پروفیسر خالد مسعود گوندل اور میڈیکل سپرنٹنڈنٹ ڈاکٹر عارف افتخار کی قیادت میں ریلی بھی نکالی گئی ۔ ریلی میں شرکاءکی کثیر تعداد نے شرکت کی۔ شرکاء نے “پاکستان زندہ باد ،پاک فوج زندہ باد “کے فلک شگاف نعروں سے اظہار محبت کیا۔ 
کسی بھی ہنگامی صورتحال سے نمٹنے کیلئے سر گنگا رام ہسپتال کے تمام شعبہ جات پوری طرح تیار ہیں۔ زخمیوں اور متاثرہ افراد کو فوری، مؤثر اور منظم طبی امداد کے لیے طبی عملے کی اضافی ڈیوٹیاں لگا دی گئیں۔اس موقع پر وائس چانسلر پروفیسر خالد مسعود گوندل نے اسسٹنٹ کمشنر لاہور سٹی بابر علی، میڈیکل سپرنٹنڈنٹ ڈاکٹر عارف افتخار اور فیکلٹی ممبران کے ہمراہ مختلف شعبہ جات اور وارڈز کا دورہ کیااور ادویات اور بیڈز کی فراہمی سمیت مختلف سہولیات کا جائزہ بھی لیا۔اس موقع پر اضافی بستروں کے انتظام سمیت طبی سازو سامان، سرجیکل آلات، ادویات اور خون کی دستیابی کو ہر ممکن طریقے سے یقینی بنانے ،کسی بھی قسم کے غیر معمولی حالات کے لیے تیار رہنے اور عوام کو طبی سہولیات کی بلا تعطل فراہمی کو یقینی بنانے کی ہدایات بھی جاری کی گئیں۔انہوں نے بلڈ بینک کا بھی دورہ کیا اور عملے کو اضافی خون کی بوتلیں بھی تیار رکھنے کی ہدایت کی۔اس وقت 200 سے زائد بلڈ بیگ سٹاک میں موجود ہیں اور فیکلٹی ،ڈاکٹرز اور پیرامیڈیکل سٹاف خون سمیت ہر طرح کی قربانی کے لیے ہمہ وقت تیار ہیں۔ موجودہ صورت حال میں میڈیکل پروفیشن ملکی محبت اور افواج پاکستان کے ساتھ جذباتی اور والہانہ لگاؤ کا اظہار کر رہا ہے۔ پروفیسر خالد مسعود گوندل کا کہنا تھا کہ فاطمہ جناح میڈیکل یونیورسٹی اور کالج آف فزیشنز اینڈ سرجنز پاکستان سمیت ہر طبی ادارہ اور شعبہ طب سے متعلقہ احباب موجودہ غیر معمولی صورتحال میں صف اول کے مجاہد بنیں گے۔
