ہم دہشت گردی برآمد نہیں کررہے بلکہ ہم خود دہشت گردی کا شکار ہیں، بلاول بھٹو
سندھ طاس معاہدے کی معطلی انسانیت کے خلاف جرم ہے، چیئرمین پیپلزپارٹی
پاکستان پیپلزپارٹی کے چیئرمین بلاول بھٹو زرداری نے کہا ہے کہ سندھ طاس معاہدے کی معطلی انسانیت کیخلاف جرم ہے، پاکستان دہشت گردی برآمد نہیں کررہا بلکہ خود دہشت گردی کا شکار ہے، بھارتی حکومت غیرذمہ داری کا مظاہرہ کررہی ہے، پاکستان قومی نے ڈر کر جینا نہیں سیکھا۔
قومی اسمبلی میں پہلگام فالس فلیگ آپریشن کے بعد بھارتی جارحیت کے حوالے سے اظہار خیال کرتے ہوئے بلاول بھٹو زرداری نے کہا کہ پہلگام واقعے کے بعد مقتولین کا خون جمنے سے قبل ہی بھارت نے پاکستان پر الزام تراشی شروع کردی، سرحدیں بند کردیں اور نتائج سے دھمکانا شروع کردیا۔
چیئرمین پیپلزپارٹی نے کہاکہ میں پاکستان عوام اور دنیا کو بتانا چاہتا ہوں کہ پاکستان کا اس جرم میں کوئی ہاتھ نہیں ہے، ہم دہشت گردی برآمد نہیں کررہے بلکہ ہم خود دہشت گردی کا شکار ہیں۔
بلاول بھٹو نے کہا کہ دہشت گردی صرف جسموں پر حملے کا نام نہیں ہے، یہ سچ، امن اور تہذیب پر حملہ ہے، دہشت گردی کسی مارکیٹ میں بم دھماکے یا فائرنگ کرنے کا نام نہیں ہے، بڑھتی ناانصافی پر عالمی خاموشی دہشت گردی ہے، مظلوم کی گردن کو بوٹوں سے دبانے کا نام دہشت گردی ہے، بلڈوزر کے ذریعے گھر کو تاریکی میں بدلنا دہشت گردی ہے، دہشتگردی وہ کرفیو ہے گھنٹوں نہیں بلکہ دہائیوں پر محیط ہے۔
انہوں نے کہاکہ بھارت دہشتگردی کے خلاف لڑنے کا دعویدار ہے مگر ہم پوچھتے ہیں کہ آپ دہشت گردی سے کیسے لڑ رہے ہیں جب آپ خود کشمیر میں ریاستی دہشتگردی کے مرتکب ہو، جب آپ مقبوضہ وادی میں خود روزانہ قانون توڑ رہے ہوں تو پھر قانون کی بات کرنا آپ کو زیب نہیں دیتا۔
چیئرمین پیپلزپارٹی نے بھارتی حکومت کو مخاطب کرتے ہوئے مزید کہا کہ جب آپ کے ہاتھ کشمیری ماؤں کے آنسوؤں، بچوں کی چیخوں اور بے جان مردوں کی خاموشی سے آلودہ ہوں تو آپ اخلاقی برتری کی بات نہیں کرسکتے۔
بلاول بھٹو زرداری نے کہاکہ پاکستان بیرونی حمایت یافتہ، نظریاتی اور انتہائی بے رحمانی دہشت گردی سے متاثر ہے، ہمیں نے اپنے فوجی جوانوں اور اسکولوں کے بچوں کو دفنایا ہے، ہم رستے زخموں کے ساتھ تنہا کھڑے تھے اور دنیا نے ہمیں بھلا دیا تھا۔
=============================
آج بھارت پوری دنیا میں مذاق بن گیا ہے، احسن اقبال
آج بھارت پوری دنیا میں مذاق بن گیا ہے، احسن اقبال
وفاقی وزیر منصوبہ بندی احسن اقبال نے کہا ہے کہ آج بھارت پوری دنیا میں مذاق بن گیا ہے، پاکستان کی حکومت اور مسلح افواج چوکس ہیں۔
نارووال میں پیس ڈائیلاگ امن کانفرنس سے خطاب میں احسن اقبال نے کہا کہ آج بھارت نے جو ہندوتوا کی نفرت پیدا کی وہ اس آگ میں خود جل رہا ہے ۔
ان کا کہنا تھا کہ ایک عام نوجوان میں سوشل میڈیا کے ذریعے نفرت کے بیج بوئے گئے، اس نوجوان کے پستول سے نکلنے والی گولی ابھی میرے جسم میں موجود ہے۔
احسن اقبال نے مزید کہا کہ سوشل میڈیا ایک ایسا ذریعہ ہے، جس کی وجہ سے لوگ اس سے متاثر ہورہے ہیں، 2018ء کے الیکشن کے وقت ہمارے خلاف نفرت پھیلائی گئی۔
وفاقی وزیر نے یہ بھی کہا کہ وزیراعظم شہباز شریف کی قیادت میں حکومت دن رات کام کر رہی ہے، ہم نے پاکستان کے معاشرے کو ایک نفرت سے پاک ملک بنانا ہے۔
========================
کراچی(اسٹاف رپورٹر) پاکستان پیپلز۔پارٹی سندھ کے صدر نثار احمد کھوڑو، نومنتخب سینیٹر و جنرل سیکرٹری پیپلز پارٹی سندھ سید وقار مہدی اور وزیر بلدیات سندھ سعید غنی نے کہا ہے کہ پاکستان پیپلز پارٹی سندھ میں کسی کو بھی بے گھر نہیں ہونے دے گی۔ کوآپریٹو فارمنگ سندھ حکومت کا کام ہے اس میں وفاق کا کوئی معاملہ نہیں ہے۔ سینیٹ میں پاکستان پیپلز پارٹی نے ہمیشہ سندھ کے اشیوز کو اجاگر کیا ہے اور آئندہ بھی سندھ کے مسائل کے حل کے لئے آواز بلند کرتے رہیں گے۔ ان خیالات کا اظہار انہوں رہنمائوں نے منگل کے روز سندھ اسمبلی میں سینیٹ کے ضمنی انتخابات کے نتائج کے اعلان کے بعد میڈیا ٹاک کرتے ہوئے کیا۔ اس موقع پر ارکان سندھ اسمبلی اور پیپلز۔پارٹی کے صوبائی و کراچی کے عہدیداران و کارکنان کی بڑی تعداد بھی ان کے ہمراہ موجود تھی۔ نثار احمد کھوڑو نے کہا کہ آج ہمارے بہت پرانے ساتھی سید وقار مہدی سینیٹ میں سینیٹر تاج حیدر کے انتقال کے بعد جگہ خالی ہونے والی نشست پر کامیاب ہوئے ہیں، جس میں اپنی پارٹی کے چیئرمین بلاول بھٹو زرداری کا شکر گذار ہوں کہ انہوں نے پارٹی کے ایک سنئیر عہدیدار کو ٹکٹ دیا۔ انہوں نے کہا کہ سید وقار مہدی پہلے بھی ایک سال 3 ماہ کے عرصے کے لیئے سینیٹر بنے تھے اور اس بار بھی وہ کچھ عرصہ کے لئے سینیٹر منتخب ہوئے ہیں اور امید ہے کہ آئندہ سینیٹ کے انتخابات میں وہ مکمل سینیٹر بھی منتخب ہوں گے۔ نثار احمد کھوڑو نے کہا کہ آج کے ضمنی انتخابات میں پیپلز پارٹی کے سندھ اسمبلی میں 116 ارکان میں سے 113 نے اپنا حق رائے دہی استعمال کیا جبکہ ہمارے تین ممبران ملک سے باہر تھے۔ نتائج کے مطابق ہمارے دو ارکان کے ووٹ خارج ہوئے اور سید وقار مہدی کو 111 ووٹ ملے جبکہ ان کے مدمقابل ایم کیو ایم کی خاتون امیدوار کو 36 ووٹ ملے۔ اس طرح سید وقار مہدی کو 85 ممبران کی برتری حاصل رہی۔ انہوں نے کہا کہ ایم کیو ایم کا حق تھا انہوں نے حق ادا کیا اور ایم کیو ایم کے 36 ارکان نے ووٹ دیا جبکہ سنی اتحاد کونسل اور جماعت اسلامی نے اس جمہوری عمل کا بائیکاٹ کیا۔ انہوں نے کہا کہ سید وقار مہدی تمام کی امیدوں پر پورا اترے گا اور مجھے خوشی ہے دوسری بار منتخب ہوا پارلیمنٹرین نے ایک سو گیارہ ووٹ دے کر کامیاب کیا۔ اس موقع پر نومنتخب سینیٹر سید وقار مہدی نے کہا کہ میں نے ہمیشہ کوشش کی سندھ کے حقوق کو ہائی لائٹ کروں۔ انہوں نے کہا کہ گذشتہ بار بھی جب میں سینیٹر تھا میں نے سندھ کے حقوق اور یہاں کے مسائل کے حل کے لئے آواز اٹھائی تھی اور آئندہ بھی اپنی پارٹی کے منشور اور وژن کے تحت سندھ کے عوام کے حقوق کے لئے آواز بلند کرتا رہوں گا۔ انہوں نے کہا کہ یہ دیکھا گیا ہے کہ ہر سال وفاقی بجٹ میں سندھ کا حصہ بہت کم رکھا جاتا ہے۔ گیس سندھ سے نکلتی ہے لیکن سندھ کو اس کے حصہ کی گیس نہیں دی جاتی ہے۔ سندھ میں بجلی کا بڑا مسئلہ ہے میں ان تمام ایشوز کو سینٹ میں اٹھاؤں گا اور سینیٹ میں سندھ کا مقدمہ سینٹ میں لڑتا رہوں گا اور سندھ کے مسائل پر آواز بلند کرتا رہوں گا۔ ایک سوال کے جواب میں نثار احمد کھوڑو نے کہا کہ کوآپریٹو فارمنگ خالص سندھ حکومت کا کام ہے اس میں وفاق کا کوئی معاملہ ہی نہیں ہے اور سندھ حکومت سندھ کے عوام کو فائدہ پہنچانے اور زیادہ سے زیادہ زمین کو کاشت کے قابل بنانے کے لئے تمام اقدامات بروئے کار لائے گی تاکہ یہاں کے لوکل لوگوں کو فائدہ پہنچ سکے۔ ایک اور سوال کے جواب میں انہوں نے کہا کہ کے پی ٹی کی جانب سے جو نوٹسز کا اجراء کیا گیا ہے وہ زمین سندھ حکومت کی ہے اور ان کو ہم سے بات کرنا پڑے گی۔ انہوں نے کہا کہ پاکستان پیپلز پارٹی اور سندھ حکومت کا واضح اور دو ٹوک موقف ہے کہ ہم کسی کے گھر کو اجاڑنے کے کسی صورت حق میں نہیں ہیں۔
