جیکب آباد: رپورٹ ایم ڈی عمرانی
جیکب آباد، سیاہ کاری کے تنازعہ میں زخمی ہونے والا نوجوان فوت۔ تفصیلات کے مطابق جیکب آباد کی تحصیل ٹھل کے گاؤں شریف خان کھوسو میں ایک ہفتہ قبل سیاہ کاری کے تنازعہ پر ہونے والے جھگڑے میں گولیاں لگنے سے زخمی ہونے والا نوجوان شوکت علی کھوسو لاڑکانہ کی اسپتال میں زخموں کے تاب نہ لاتے ہوئے چل بسا، فوت ہونے والے نوجوان کی لاش تعلقہ اسپتال ٹھل لائی گئی جہاں ضروری کاروائی کے بعد لاش ورثہ کے حوالے کی گئی، مقتول نوجوان کے ورثہ کا کہنا تھا کہ پولیس نے تاحال ملزمان کو گرفتار نہیں کیا ہے انہوں نے مطالبہ کیا ہے کہ قاتلوں کو گرفتار کیا جائے۔
جیکب آباد پولیس کی کاروائیاں، بھاری مقدار میں چرس برآمد کرکے 5 ملزمان کو گرفتار کرلیا۔ تفصیلات کے مطابق جیکب آباد پولیس نے مختلف مقامات پر کاروائیاں کرتے ہوئے بھاری مقدار میں چرس برآمد کرکے 5 ملزمان کو گرفتار کرنے کا دعویٰ کیا ہے، گڑہی حسن تھانہ کی پولیس نے جاڑا واہ کے قریب چیکنگ کے دوران ایک ملزم محمد علی گھنیو کو گرفتار کرکے اس کے قبضے سے 3 کلو چرس برآمد کرلی ہے، علاوہ ازیں سی آئی اے پولیس نے تین مختلف مقامات پر کاروائیاں کرتے ہوئے امداد علی کلہوڑو سے 600 گرام، دوسرے ملزم اشفاق شیخ سے 550 گرام اور تیسرے ملزم فداحسین سے 1100 گرام چرس برآمد کرکے گرفتار کرلیا ہے، دریں اثناء سول لائن تھانہ کی پولیس نے کاروائی کرتے ہوئے ایک ملزم امداد علی کو گرفتار کرکے اس کے قبضے سے 300 گرام چرس برآمد کرلی، پولیس نے گرفتار تمام ملزمان کے خلاف مقدمہ درج کرلیا ہے۔
جیکب آباد پاک بھارت کشیدگی، پولیس کے جوان پاک فوج کے ساتھ ملکر بھارت کو منہ توڑ جواب دینے کے لیے پرعزم، تیاریاں مکمل۔ تفصیلات کے مطابق پاکستان اور بھارت کے درمیان جاری کشیدہ صورتحال کو دیکھتے ہوئے جیکب آباد پولیس کے جوانوں نے بھی بھارت کو منہ توڑ جواب دینے کے لیے تیاریاں شروع کردی ہیں، جیکب آباد کی تحصیل ٹھل کے اے سیکشن تھانہ پر تعینات پولیس کے جوانوں نے بھارتی جارحیت کا جواب دینے کے لیے تیاریاں شروع کردی ہیں، تھانہ کے ہیڈ محرر بقا محمد مہر نے جوانوں سے خطاب کرتے ہوئے کہا کہ بھارت کی جارحیت کا جواب دینے کے لیے پاک فوج کے ساتھ پولیس کے جوان بھی شانہ بشانہ کھڑے ہونگے اور اس سلسلے میں پولیس کے جوانوں نے اپنی تیاریاں مکمل کرلی ہیں، انہوں نے کہا کہ پاکستان کی طرف میلی آنکھ سے دیکھنے والوں کو منہ کی کھانا پڑے گی، دشمن کا مقابلہ کرنے کے لیے پاک فوج کے ساتھ پولیس کے جوان اور ہر پاکستانی تیار ہے اگر بھارت نے غلطی کی تو اسے منہ توڑ جواب دیں گے۔
