پریس ریلیز
کراچی ( ) پاکستان مرکزی مسلم لیگ کراچی کے صدر احمد ندیم اعوان نے شہر قائد میں ڈمپر کی ٹکر سے جاں بحق ہونے والی معصوم بچے اور اس کے زخمی والدین کے سانحے پر گہرے رنج و غم کا اظہار کیا ہے۔ انہوں نے کہا کہ کراچی کے باسی ایک طویل عرصے سے بے لگام اور لاپرواہ ڈمپرز کے رحم و کرم پر ہیں، اور آئے روز ایسے دلخراش حادثات شہریوں کے جان و مال کو نگل رہے ہیں۔
انہوں نے افسوس کا اظہار کرتے ہوئے کہا کہ ڈمپرز اور ٹینکرز کی تیز رفتاری اور قوانین کی کھلی خلاف ورزی کے باوجود سندھ حکومت کی بے حسی اور غیر سنجیدگی لمحہ فکریہ ہے۔ کیا کراچی کے شہریوں کی جانیں اتنی سستی ہو چکی ہیں کہ جب چاہے کوئی ڈمپر ان کی زندگی کا چراغ گل کر دے اور معصوم خاندان اجڑ جائیں؟
احمد ندیم اعوان نے کہا کہ گزشتہ چند ماہ میں ڈمپرز سے ہونے والے حادثات کی بڑھتی ہوئی تعداد سندھ حکومت کی انتظامی ناکامی کا منہ بولتا ثبوت ہے۔ یہ واضح ہو چکا ہے کہ سندھ حکومت کراچی کے سنگین مسائل کو سنبھالنے کی اہلیت نہیں رکھتی۔
انہوں نے مطالبہ کیا کہ ڈمپرز اور ٹینکرز سے متعلق ٹریفک قوانین پر سختی سے عملدرآمد یقینی بنایا جائے، ساتھ ہی سڑکوں پر حفاظتی اقدامات کو بہتر بنایا جائے تاکہ مستقبل میں اس قسم کے جان لیوا حادثات سے بچا جا سکے۔
شعبہ نشرو اشاعت، پاکستان مرکزی مسلم لیگ کراچی
