پریس ریلیز
لاڑکانہ( ) پاکستان مرکزی مسلم لیگ سندھ کے زیراہتمام لاڑکانہ شہر باغ جناح کے مقام پر سندھ امن کانفرنس کا انعقاد کیا گیا ۔ جس میں عوام کی بڑی تعداد نے شرکت کی۔ کانفرنس سے سندھ کے صدر فیصل ندیم، لاڑکانہ ڈویژن کے صدر محمد امین چنا، حیدرآباد ڈویژن کے صدر عقیل احمد لغاری، کراچی کے صدر احمد ندیم اعوان، صوبائی رہنما حافظ محمد انور، شعیب سندھی اور جماعت اسلامی سندھ کے صدر کاشف سعید اور دیگر رہنماؤں نے خطاب کیا۔ مقررین نے سندھ کے عوام کو درپیش خطرات ، سندھ کینالز منصوبے، ہندوستان کے پہلگام واقعے، اور صوبے کے امن و امان پر اپنے مؤقف کا اظہار کیا۔
صدر مرکزی مسلم لیگ سندھ فیصل ندیم نے اپنے خطاب میں کہا کہ سندھ کے حقوق پر سب سے بڑا ڈاکہ پیپلز پارٹی نے ڈالا ہے، جو آج کینالز کے خلاف مگرمچھ کے آنسو بہا رہی ہے۔ اگر پیپلز پارٹی نے آغاز میں ہی ان منصوبوں کی مخالفت کی ہوتی تو آج وہ عوامی چیمپئن کہلاتی، مگر افسوس کہ انہوں نے ہمیشہ عوام دشمنی کا ثبوت دیا ۔ انہوں نے کہا کہ بھٹو کے شہر لاڑکانہ میں تعلیم و صحت جیسی بنیادی سہولتوں کا فقدان پیپلز پارٹی کی کارکردگی پر سوالیہ نشان ہے۔
فیصل ندیم نے کہا کہ پہلگام میں معصوم شہریوں کا قتل ہندوستان کی سازش ہے، جس سے پاکستان کو بدنام کرنے کی ناکام کوشش کی گئی۔ مرکزی مسلم لیگ اس ظلم کی سخت مذمت کرتی ہے۔ اگر بھارت نے پہلگام ڈرامے کی آڑ میں کوئی جارحیت کی تو جواب مذمت سے نہیں بلکہ مرمت سے دیا جائے گا۔
لاڑکانہ ڈویژن کے صدر محمد امین چنا نے کہا کہ مرکزی مسلم لیگ کسانوں کے معاشی قتل کے خلاف آواز بلند کرے گی، جبکہ حیدرآباد ڈویژن کے صدر عقیل لغاری نے کہا کہ سندھ باب الاسلام ہے، جسے اسلام کا گہوارہ بنایا جائے گا۔ انہوں نے لسانیت و علاقائیت کو مسترد کرتے ہوئے اتحاد و اخوت پر زور دیا۔
کراچی کے صدر احمد ندیم اعوان نے کہا کہ سندھ محبت اور امن کی سرزمین ہے، جس پر دشمنوں کی سازشیں کامیاب نہیں ہوں گی۔ حافظ محمد انور نے سندھ طاس معاہدے پر بھارت کے یکطرفہ اقدامات کو ناقابل قبول قرار دیا اور خبردار کیا کہ مسلمان جب تک قرآن و حدیث کے مطابق زندگی گزاریں گے، انہیں شکست نہیں دی جا سکتی۔
صوبائی رہنما شعیب سندھی نے کہا کہ سندھ پر مسلط حکمرانوں نے عوام کو صرف محرومیاں دیں۔ اب مرکزی مسلم لیگ عوام کو مایوسی سے نکالے گی۔ جماعت اسلامی سندھ کے صدر کاشف سعید نے غزہ کے مظلوم مسلمانوں کے حق میں آواز بلند کی اور کہا کہ امت مسلمہ کو عملی اقدامات کرنے ہوں گے۔
کانفرنس میں متفقہ طور پر کہا گیا کہ غیر قانونی کینالز، بھارت کی آبی جارحیت، سندھ کے امن پر حملے اور فلسطین میں مظالم جیسے حساس مسائل پر مرکزی مسلم لیگ دوٹوک مؤقف رکھتی ہے اور عوامی حقوق کے تحفظ کے لیے ہر فورم پر آواز بلند کرے گی۔
