25 اپریل 2025
راولپنڈی
فارما ٹریڈ نے فلسطین میں صیہونی مظالم اور دہشتگردی کے خلاف ملک بھر کے تمام کاروباری مراکز و مارکیٹوں میں ایک دن ملک گیر ہڑتال کی حمایت کا اعلان کردیا، مریضوں اور عوامی مشکلات کے سبب ہسپتالوں اور جان بچانے والی ادویات کے حصول کی وجہ سے ہسپتالوں کے سامنے قائم فارمیسیز چین، فارمیسیز و کیمسٹ کے کاروباری مراکز دن 12 بجے تک بند رہیں گے۔
ان فیصلوں کا اعلان پاکستان کیمسٹ اینڈ ڈرگسٹ ایسوسی ایشن پاکستان کے مرکزی لائزن آفس مال روڈچیئرمین سنٹرل عبدالصمد بدھانی کی صدارت میںوڈیو لنک کے ذریعے اجلاس میں کیا گیا ۔پی سی ڈی اے کے اجلاس میں کراچی سے گروپ لیڈرز صلاح الدین شیخ ، غلام ہاشم نورانی، پنجاب سے زاہد بختاوری، باسط عباسی، ارشد اعوان، چوہدری عمران رشید ، اٹک سے طارق محمود اور پشاور سے سراج الدین و دیگر صوبائی چیئرمین اور چین فارمیسیز ایسوسی ایشن پاکستان کے چیئرمین محبوب احمد اور نائب صدر شیخ طلعت محمود شریک ہوئے ۔اجلا س میں کیے گئے فیصلہ کے مطابق پاکستان کیمسٹ اینڈ ڈرگسٹ ایسوسی ایشن آج کی ہڑتال میں ملک کی تاجر برادری کے ساتھ شانہ بشانہ کھڑی ہے۔ اجلاس سے خطاب میں زاہد بختاوری نے ملک بھر میں آج تاریخ سازہڑتال کی مکمل حمایت کا اعلان کرتے ہوئے کہا کہ یہ ہڑتال صیہونی مصنوعات کی بائیکاٹ کی ملک گیر مہم کو منظم اور غزہ کے محاصرے اور اسرائیلی بربریت و مظالم کے خاتمے کیلئے ایک اہم سنگ میل کے ساتھ مسلم دنیا کے حکمرانوں کو خواب غفلت سے جگانے کا ذریعہ بنے گا۔ اس موقع پر زاہد بختاوری اور پاکستان کیمسٹ اینڈ ڈرگسٹ ایسوسی ایشن کے قائدین نے مریضوں اور عوامی مشکلات کو مدنظر رکھتے ہوئے کیمسٹ برادری سے اپیل کرتے ہوئے کہا کہ آج ملک کے تمام فارما ٹریڈ کے کاروباری مراکز اور خاص کر ہسپتالوں کے سامنے فارمیسیز، چین فارمیسیز، کیمسٹ اپنا کاروبار دوپہر12 بجے تک آدھے دن کے لئے اور ہول سیلرز کے کاروباری مراکز پورے دن کے لئے اپنا کاروبار بند کر شٹر ڈاون ہڑتال میں شریک ہونگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
