یونان: (انصر اقبال بسراء سے )
اولڈھم، برطانیہ — منہاج القرآن انٹرنیشنل کے ڈائریکٹر ایجوکیشن اینڈ پروفیشنل ڈویلپمنٹ، حافظ محمد سعید رضا بغدادی کے اعزاز میں منہاج القرآن کے رہنما چوہدری عمران اسلم پسوال کی جانب سے ایک پرتکلف عشائیہ دیا گیا۔
تقریب میں منہاج القرآن مانچسٹر کے سینئر نائب صدر اکرام اللہ ورک، جنرل سیکرٹری احسن خان، اور متعدد سیاسی، سماجی و کاروباری شخصیات نے شرکت کی، جن میں چوہدری عارف پسوال، چوہدری عظمت پسوال، سید زین العابدین، طارق محمود، اسجد خان پسوال، جاوید گجر، علی عظمت پسوال، محمد فیضان گجر، محمد یوسف، اور محمد عقیل شامل تھے۔
تقریب کا آغاز قاری طیب کی تلاوت کلام پاک سے ہوا، جس کے بعد نعت رسول مقبول ﷺ پیش کی گئی۔ چوہدری عمران اسلم پسوال نے تمام مہمانوں کا استقبال کیا اور حافظ سعید رضا بغدادی کا تعارف کراتے ہوئے ان کی آمد کا خیرمقدم کیا۔
حافظ سعید رضا بغدادی نے اپنے خطاب میں کہا کہ دیارِ غیر میں مقیم مسلمانوں کو چاہیے کہ وہ اپنے ظاہر و باطن کو سنوارنے کی کوشش کریں اور اسلام و قرآن کے سفیر بنیں۔ انہوں نے مزید کہا کہ قرآن مجید سے تعلق ہماری زندگیوں میں انقلاب لا سکتا ہے، اور ہمیں چاہیے کہ ہم اپنی نسلوں کو قرآن کی تعلیمات سے روشناس کرائیں۔ 
انہوں نے چوہدری عمران اسلم پسوال کی شاندار میزبانی پر شکریہ ادا کرتے ہوئے کہا کہ ایسی تقریبات نہ صرف محبت و اخوت کو فروغ دیتی ہیں بلکہ دینی شعور بیدار کرنے میں بھی مددگار ثابت ہوتی ہیں۔
تقریب میں شریک مہمانوں نے حافظ سعید رضا بغدادی کی علمی و روحانی خدمات کو سراہا اور ان کے پیغام کو اپنی زندگیوں میں اپنانے کے عزم کا اظہار کیا۔
یہ عشائیہ منہاج القرآن انٹرنیشنل کی تعلیمی و روحانی خدمات کے تسلسل کا مظہر تھا، جو دنیا بھر میں قرآن و سنت کی روشنی پھیلانے کے لیے کوشاں ہے۔
