علاقائی تجارت کے فروغ کے تناظر میں انٹرنیشنل میڈیشن اینڈ اربیٹریشن سینٹر کا کردار نہایت اہم ہے: بیرسٹر عقیل ملک
اسلام آباد، 24 اپریل 2025 — مملکت برائے قانون و انصاف، بیرسٹر عقیل ملک نے انٹرنیشنل میڈییشن اینڈ آربیٹریشن سینٹر (IMAC) کا دورہ کیا، جو کہ وفاقی وزارت قانون و انصاف کا ایک اہم منصوبہ ہے۔ اس موقع پر رجسٹرار آئی ایم اے سی احسان اللہ خان نے وزیر مملکت کو ادارے کے مینڈیٹ، سرگرمیوں اور مستقبل کی حکمت عملی سے آگاہ کیا۔
بیرسٹر عقیل ملک نے زور دیتے ہوئے کہا کہ ملک کی عدالتوں میں زیر التواء مقدمات کی بھرمار کے پیش نظر متبادل تنازعہ حل (ADR) کا نظام اب وقت کی اہم ترین ضرورت بن چکا ہے۔
انہوں نے کہا کہ آئی ایم اے سی ملکی و بین الاقوامی سطح پر مؤثر تنازعات کے حل کے لیے ایک کلیدی ادارے کے طور پر سامنے آ رہا ہے۔
انہوں نے پاکستان کے وسطی ایشیائی ریاستوں، آذربائیجان، ترکی، بنگلہ دیش اور سری لنکا کے ساتھ بڑھتے ہوئے تجارتی تعلقات کا حوالہ دیتے ہوئے کہا کہ ایسے میں آئی ایم اے سی جیسے مضبوط ادارے کی ضرورت میں نمایاں اضافہ ہوا ہے۔ وزیر مملکت نے آئی ایم اے سی کی جانب سے قانونی ماہرین اور دیگر اسٹیک ہولڈرز کے لیے ملک گیر آگاہی اور تربیتی پروگراموں کو سراہا جن کا مقصد ADR کے دائرہ کار کو مضبوط بنانا ہے۔
وزیر مملکت نے تجویز دی کہ مستقبل کی تربیتی سرگرمیوں میں مذاکراتی مہارت (Negotiation Skills) کو بھی شامل کیا جائے تاکہ شرکاء کو حقیقی دنیا کے تنازعہ جات کے حل کے لیے بہتر طور پر تیار کیا جا سکے۔
اس بریفنگ میں پراجیکٹ ڈائریکٹر آئی ایم اے سی محترمہ عائشہ رسول اور لیگل ایڈ اینڈ جسٹس اتھارٹی کے ڈائریکٹر جنرل جناب عدیل انور بھی شریک تھے۔
یہ دورہ حکومت کے اس عزم کی توثیق ہے کہ پاکستان میں ADR کو ایک ادارہ جاتی اصلاح کے طور پر فروغ دیا جائے گا تاکہ نظامِ انصاف کی فراہمی کو بہتر بنایا جا سکے اور معاشی و تجارتی ترقی کو مؤثر طور پر سہارا دیا جا سکے۔
