کراچی، 23 اپریل۔
چیف سیکریٹری سندھ آصف حیدر شاہ نے کلفٹن روڈ، فریئر ٹاؤن کوارٹرز، باتھ آئی لینڈ روڈ، پلاٹ نمبر FT-4/14 پر واقع (Heritage ) تاریخی ورثے کی حامل عمارت “خارس ہاؤس” کو منہدم کرنے کے واقعے کا سختی سے نوٹس لیا ہے۔
چیف سیکریٹری نے کمشنر کراچی کو ہدایت دی ہے کہ اس معاملے کی مکمل تحقیقات کی جائیں اور 72 گھنٹوں کے اندر ایک جامع رپورٹ پیش کی جائے۔ انہوں نے مزید کہا کہ اگر تحقیقات کے دوران کوئی بے ضابطگیاں سامنے آئیں تو ذمہ دار افراد اور متعلقہ افسران کے خلاف سخت کارروائی عمل میں لائی جائے۔
سیکریٹری ثقافت، سیاحت، نوادرات و آرکائیوز، خیر محمد کلوڑ، اور ڈائریکٹر جنرل سندھ بلڈنگ کنٹرول اتھارٹی (ایس بی سی اے) اسحاق کھوڑو کو ہدایت دی گئی ہے کہ وہ تحقیقات کے دوران کمشنر کراچی کو مکمل معاونت فراہم کریں۔
چیف سیکریٹری آصف حیدر شاہ نے اس واقعے پر شدید تشویش کا اظہار کرتے ہوئے کہا ہے کہ ثقافتی اور تاریخی ورثے کا تحفظ انتہائی اہم ہے۔ انہوں نے واضح کیا کہ ورثے کی حامل عمارات سے متعلق کسی بھی قسم کی غفلت یا غیرقانونی کارروائی برداشت نہیں کی جائے گی اور اس کے خلاف قانونی کارروائی کی جائے گی۔
مزید برآں، چیف سیکریٹری نے سیکریٹری ثقافت کو ہدایت دی کہ کراچی بھر میں ورثے کی حامل عمارات کا میپنگ کا عمل فوری طور پر شروع کیا جائے اور مستقبل میں اس قسم کی خلاف ورزیوں یا غیرقانونی انہدام کی روک تھام کے لیے نگرانی کے نظام کو مؤثر بنایا جائے۔
